“Daryo”da Qarshida bir jinoyat sodir bo‘lgani, o‘g‘rilikka kirganlar xonadondan hech narsa olishmagani, gumonlanuvchilarni izlayotgan IIB esa kechasi ko‘chada yurganlarni ham so‘roqqa chaqirib, hech bo‘lmaganda Ma’muriy javobgarlik to‘g‘risidagi kodeksning 183 va 194-moddalari bilan ularni ayblab, birin-ketin qamayotgani xabar berilgandi. IIB xodimiga bo‘ysunmadi, mayda bezorilik sodir etdi deya navbatchi ayblovlar bilan 7-10 sutkaga qamalgan fermerlar “Daryo” muxbiriga bu haqda gapirib bergach, tuman IIBga chaqirilgan.
Meni ham qayta-qayta bezovta qilishdi. Ammo rasmiy chaqiruv qog‘ozi berishmagani uchun IIBga bormadim. Anvar ismli fermerni majburlab, tuman IIBga olib borishgan va bosim qilishgan, deydi muammoni gapirganidan so‘ng o‘zlariga bosim qilinayotganidan shikoyat qilgan fermer Bekzod Farmonov.
Fermerlarning ma’lumot berishicha, 2024-yilning 25-noyabr kuni Qarshi tumanining Charog‘il qishlog‘idagi xonadonlarning biriga o‘g‘rilikka tushilgan. Lekin hech narsa o‘g‘irlanmagan. O‘g‘rilikka kirgani aytilayotgan uch kishi xonadonning yoshi keksalaridan biriga tan-jarohati yetkazgan. Xonadon egasining yosh qizi uyidan yashirincha chiqib, qo‘shnilariga xabar berishi sabab gumonlanuvchilar voqea joyidan qochib ketgan. Viloyat hamda tuman IIBlaridan iborat maxsus guruh o‘shandan beri gumonlanuvchilarni izlamoqda. Biroq, jinoyat ishi hali ochilmagan.
Anvar ismli fermerning aytishicha, uni tuman IIBga majburan olib borib, bosim o‘tkazgan xodimlarning biri Sherzod, ikkinchisi Ulug‘bek va uchinchisi esa Ilhom bo‘lgan.
Stolning ustiga piyola qo‘yib, shuni bor qiluvchi ham, yo‘q qiluvchi ham biz bo‘lamiz deyishdi, deydi fermer.
Fermer Bekzod Farmonovning qo‘shimcha qilishicha, tuman IIB xodimlari muammo haqida jurnalistga gapirgan yana bir fermer — Jamshid Qiyomovni ham chaqirtirgan.
Menga ham Jamshid ham chaqiruv qog‘ozi bermagani uchun bormadik. Rasmiy chaqiruv qog‘oz bering, keyin boramiz dedik, deydi fermer.
Qashqadaryo viloyat IIB axborot xizmati hozircha fermerlarning dastlabki chiqishiga ham munosabat bildirmadi.
Izoh (0)