“Uyda yolg‘iz” komediyasida bosh qahramon Kevin Makkallisterning oilasi yashagan ikki qavatli uy Yangi yil bayrami arafasida o‘z xaridorini topdi. Bu haqda Officelife.media xabar bermoqda.
Chikago chekkasidagi Vinnetka qishlog‘ida joylashgan qariyb 850 metr kvadrat maydonga ega ikki qavatli g‘ishtin uy joriy yil may oyida 5,25 million dollarga baholangan edi.
Makkallisterlar uyi 1990-yildagi film muvaffaqiyatidan keyin ikkinchi marta sotuvga qo‘yilgan. 2012-yilda uy 1,58 million dollarga sotilgan. Xaridor topilishiga bir yil vaqt ketgan.
Keyin yangi egalar uyni keng ko‘lamli qayta ta’mirdan o‘tkazgan. Bosh qahramon chanada tushgan ikkinchi qavatdagi asosiy zinapoya ham rekonstruksiya qilingan.
Ko‘chmas mulk ikkita mehmonxona, beshta yotoqxona va oltita yuvinish xonasidan iborat. Shuningdek, bu yerda katta qishki bog‘, kinozal va basketbol o‘ynash uchun sport maydonchasi ham mavjud.
Kevin obrazini gavdalantirgan Makoley Kalkin AQSH OAVlaridan biriga bergan intervyusida mazkur uyni shaxsan o‘zi sotib olmoqchi ekanligini aytgan, biroq aktyor bu fikridan qaytgan.
Izoh (0)