“Liverpul” hujumchisi Muhammad Saloh APLning 18-turida “Lester” ustidan o‘z uyidagi g‘alabadan so‘ng “mersisaydliklar”ning joriy mavsumdagi ehtimoliy chempionligi haqidagi savolga javob berdi.
“Bu alohida narsa. Umid qilamanki, biz bu klub uchun Premyer Ligada g‘alaba qozonamiz — bu mening orzum. Umid qilamanki, bu amalga oshadi”, deya Salohning so‘zlarini keltiradi “Liverpul” rasmiy sayti.
Quyuq tuman ostida o‘tkazilgan uchrashuvda hisobni “tulkilar” ochdi. Birinchi taymning so‘nggi daqiqalarida Gakpo hisobni tenglashtirdi. Ikkinchi bo‘limni hujumkor o‘tkazgan mezbonlar yakunda Jons va Salohning gollari evaziga 3:1 hisobida g‘alaba qozondi.
“Lester” ustidan erishilgan g‘alabadan so‘ng, “Liverpul” 17 o‘yindan 42 ochko to‘pladi va APL chempionligi poygasida “Chelsi”dan 7 ochkolik farq bilan peshqadamlik qilmoqda. Ular zaxirasida bir uchrashuv ham bor. Yo‘qotilgan ochkolar bo‘yicha “qizillar”ning eng yaqin ta’qibchisi “Arsenal” bo‘lib turibdi. London klubi 17 o‘yindan keyin 33 ochko bilan turnir jadvalida to‘rtinchi o‘rinni egallab turibdi. “Nottingem Forest” 18 turdan keyin 34 ochko bilan uchinchi o‘rinda bormoqda.
Avvalroq Saloh va klub o‘rtasidagi shartnoma uzaytirish borasida muzokalar olib borilayotgani xabar qilingandi.
Izoh (0)