Yangi yil arafasida oilasidan uzoqda qolib ketgan zukko bolakay haqidagi “Uyda yolg‘iz” komediyasi har yili yosh-u qari tomonidan sevib tomosha qilinadi. Filmning rejissyori Kris Kolumb va nihoyat Kevin Makkalisterning ota-onasi Chikagodagi keng uy va qishki ta’tildagi qimmatbaho sayohatlar uchun katta miqdorda pulni qanday ishlab topgani haqida ma’lumot berdi.
The Hollywood Reporter nashriga bergan intervyusida rejissyor Kevinning ota-onasi aynan qaysi sohada ishlagani haqida belgi beruvchi ishoralar bor ekanligi haqida aytdi. Komediyaning birinchi qismida Kevin bezorilarni qo‘rqitish uchun ko‘plab manekenlardan foydalangan va uyda ziyofat bo‘layotgan tasvirni derazalar orqali ko‘rsatishga muvaffaq bo‘lgan.
Manekenlarning ko‘pligidan bilish mumkinki, Kevinning onasi Keyt Makkalister dizayner-modelyer bo‘lgan va yaxshi daromadga ega bo‘lgan.
Jon Herd ijro etgan ota obrazi — Piter Makkallisterga kelsak, u haqida turli nazariyalar bor. Ammo amerikalik yozuvchi Todd Strasser tomonidan yozilgan rasmiy kitobda aytilishicha, oila boshlig‘i Chikago fond birjasida muvaffaqiyatli treyder bo‘lib ishlagan.
Qiziqarli ma’lumot:
“Uyda yolg‘iz” filmida o‘g‘ri Garri obrazini yaratgan aktyor Jo Peshi qora qalpog‘i yonib ketgan epizodda haqiqatda boshini kuydirib olgan. Bundan tashqari, u suratga olish jarayonida Makoley Kalkin bilan atayin kam gaplashgan va shu orqali bezori va yosh bola o‘rtasidagi dinamiklik kadrda saqlanib qolishiga erishgan.
Izoh (0)