Farg‘onalik galstukli qassob: “Maqsad — shunchaki tirikchilik emas” (video)

Dilshodjon Raimov Farg‘ona shahrida 23 yildan buyon qassoblik qilib keladi. 40 yoshli go‘sht sotuvchisi har kuni o‘z ishini kostyum-shim kiyib, galstuk taqqan holda boshlaydi. Garchi bunday imij O‘zbekistonda noodatiy bo‘lsa-da, atrofdagilar va tarmoqlardagi kuzatuvchilar buni yaxshi qabul qilmoqda.
“Daryo” muxbiri Dilshodjon Raimovdan qassoblik faoliyati haqida intervyu oldi.

 

Imijning paydo bo‘lishi

Turkiyaga oilaviy dam olishga borganimda tilla do‘koniga kirdik. Kostyum-shim kiygan, galstuk taqqan sotuvchi bizni ochiq chehra bilan qarshi oldi. Unga biror narsa sotib olish uchun emas, shunchaki tomoshaga kirganimizni aytdim. U esa “Har bir keluvchi bizga qadrli”, deb mahsulotlar, narxlari va sifati haqida erinmay, g‘ijjalab tushuntirib berdi. Chiqib ketayotganimizda tabassum bilan kuzatib qo‘ydi. Shundan keyin xulosa qildim: men ham do‘konimda xaridorlarga shunday ko‘rinishda va muomalada bo‘laman.

Sekin-asta go‘sht do‘konimning dizaynini o‘zgartirib, o‘zim uchun imij yaratdim. Galstuk taqib, kostyum-shimda yurish kundalik hayot tarzimga aylanib qoldi.

Chet elda 200-300 yillik do‘konlarni ko‘rganimda ularning o‘z tarixi, shakllanishi va asoschilarining rasmlarini ko‘rganman. Men ham do‘konimizga boshqacha joziba berish maqsadida rasmlar chizdirib, devorlarga osib qo‘ydim. Bundan tashqari, ancha-muncha gullarimiz ham bor.

Ota-onam sababchi

Maktabni bitirganimdan keyin o‘qishga kirishga xohish bo‘lmadi. Ota-onam qassoblikka majburlab shogirdlikka berishdi. Boshida yoqmadi, qochib ham ketdim. Shogird bo‘lib yurganingizda ko‘nikmagan bo‘lasiz, ish og‘ir tuyuladi. Shunday vaqtlarda tashlab ketib, boshqa kasb tanlashni ham o‘ylab ko‘rganman. Uydagilar qattiq turishdi, vaqt o‘tib qiziqib ketdim.

Erta tongdan ish boshlab, to kechki qorong‘igacha ishlardik. Kuniga 2-3 ta mol so‘yib, sotardik. Besh oycha yordamchi bo‘lib yurdim. Bir yil ichida mustaqil mol so‘yadigan bo‘ldim. Mana, 23 yildan beri qassoblik qilib kelyapman.

Ustozim bilan 17 yil birga ishladik. Mustaqil ish boshlaganimga besh yil bo‘ldi. Shu davr mobaynida ishimizni takomillashtirib borishga harakat qildim. Hozir ham o‘z ustimizda ishlashda davom etyapmiz.

Tuyaqush va tuya

Do‘konimizda tuyaqush go‘shtini sotishni yo‘lga qo‘yganmiz. Birinchi marta uni so‘yib, videosini Instagram’ga joylab, “Bu qanday hayvonning go‘shti?”, deb post qo‘yganimizda 40 milliondan ortiq ko‘rildi. Balki uni teskari qilib ilganimiz ko‘pchilikka boshqacha tuyulgandir. Izohlarda chet eldan ham yozganlar bo‘ldi. Go‘shtini vodiydan, Toshkentdan, hatto Xorazmdan bog‘lanib, so‘rayotganlar bor.

Tuya go‘shtini ham sotyapmiz. Tuyadan kam go‘sht chiqqani uchun narxi biroz qimmatroq, lekin xaridorgir. Tuya go‘shti mol va qo‘y go‘shtiga qaraganda yoqimli, xushbo‘y va yumshoq.

Maqsad — shunchaki tirikchilik emas

Ijtimoiy tarmoqlarda nafaqat o‘zimizdagi, balki chet eldagi qassoblar faoliyatini kuzatib boraman. O‘rganganlarimni ishimizda qo‘llayman. Shu asnoda O‘zbekistondagi eng yaxshi qassob bo‘lish va bu orqali dunyoga chiqish niyati paydo bo‘ldi.

Nasib bo‘lsa, turistlar kelib ko‘rib ketadigan qassoblikka ixtisoslashgan kompleks qilmoqchimiz. Unda mol tug‘ilishidan to go‘sht bo‘lib sotuvga chiqishgacha bo‘lgan jarayonlarni ko‘rsatib o‘tishni reja qilganmiz. Maqsadim — shunchaki qassoblik qilib, tirikchilik o‘tkazish emas.