Rossiya musulmonlari diniy boshqarmasi ulamolar kengashi ko‘pxotinlikka ruxsat beruvchi fatvoni qaytarib oldi. Bu haqda kengash raisi Shamil Alyautdinov xabar berdi.
Qaror Bosh prokuraturaning chaqirig‘i va Rossiya jamoatchiligining munosabati bilan qabul qilingan.
Rossiya Bosh prokuraturasi “Rossiya musulmon hamjamiyatida ko‘pxotinlilik masalasi” fatvosini bekor qilishga chaqirgani haqidagi OAVda paydo bo‘lgan ma’lumot va Rossiya jamoatchiligi tomonidan bildirilgan munosabat sababli, Musulmonlar diniy boshqarmasi ulamolar kengashi mazkur fatvoni qaytarib olmoqda. Bu Allohning irodasi, shu bois Rossiya musulmonlari diniy boshqarmasi bu masalada munozaraga kirishishni ma’qul ko‘rmaydi, deyiladi rasmiy munosabatda.
Rossiyada ko‘p xotinlilik haqidagi fatvo va Bosh prokuraturaning munosabati
19-dekabr kuni Rossiya musulmonlari diniy boshqarmasi Ulamolar kengashi fatvo e’lon qildi. Unda musulmon erkaklar to‘rttagacha sha’riy nikoh tuzishlari mumkinligi aytilgan. Nikoh tuzish mumkin bo‘lgan sabablar ro‘yxati, shuningdek, ko‘pxotinlikka yo‘l qo‘yiladigan shartlar ko‘rsatilgan.
23-dekabr kuni Rossiya Bosh prokuraturasi fatvo munosabati bilan Musulmonlar diniy boshqarmasi raisiga taqdimnoma kiritdi.
RF Oila kodeksining 1-moddasiga ko‘ra, Rossiyada fuqarolik holati dalolatnomalarini qayd etish organlarida tuzilgan nikoh tan olinadi. Fuqarolarning nikohga kirish va oilaviy munosabatlarda, shu jumladan diniy mansubligiga ko‘ra, huquqlarini cheklashning har qanday shakli taqiqlanadi, degan manba.
Izoh (0)