Madridning “Real” klubi 2025-yilning yozgi transfer oynasida “Liverpul”ning ikki futbolchisini erkin agent sifatida tarkibga qo‘shib olishni rejalashtirmoqda. Bu haqda Ispaniyaning Defensa Central nashri xabar bermoqda.
Manbaga ko‘ra, “qirollik klubi” “Liverpul” sardori Virjil van Deyk va Trent Aleksander-Arnold bilan kelishuvga erishish maqsadida yanvar oyidayoq muzokaralar o‘tkazishni rejalashtirgan. Ma’lum bo‘lishicha, har ikki futbolchining ingliz klubi bilan shartnomani uzaytirishda qiyinchiliklar bor, shu bois “Real” yulduz futbolchilarni bepul qo‘lga kiritish uchun faol harakat qilish niyatida.
Eslatib o‘tamiz, Van Deyk va Aleksander-Arnoldning “Liverpul” bilan amaldagi shartnomasi 2025-yil yoziga qadar mo‘ljallangan. 1-yanvardan boshlab ular xorijdagi klublar bilan muzokaralar o‘tkazish huquqiga ega bo‘ladi.
Joriy mavsumda 33 yoshli niderlandiyalik himoyachi klub safida barcha turnirlarda 22 ta o‘yinda maydonga tushib, 2 ta gol va 1 ta golli uzatma amalga oshirdi. 26 yoshli ingliz futbolchisi esa 21 o‘yinda qatnashib, 5 ta golli uzatma berdi.
Avvalroq “Real Madrid” “Pachuka”ni mag‘lub etib, Qitʼalararo kubogida chempion bo‘lgani xabar qilingandi.
Izoh (0)