Qish kunlarida avtomobilingiz bilan yo‘lda qolib ketmaslik uchun zarur bo‘lgan quyidagi kerakli buyumlarni o‘zingiz bilan olib yuring.
Qulf muzlarini erituvchi va silikon moyi
Mutaxassislarning tajribasiga ko‘ra, haydovchi duch keladigan birinchi muammo — bu muzlagan qulflar va eshiklar bo‘lishi mumkin. Eshiklarning rezina zichlagichlariga vaqti-vaqti bilan tarkibida silikon bo‘lgan moy surtib turish kerak, shunda ular muzlab qolmaydi. Qotib qolgan qulflar uchun esa maxsus vosita — muzni erituvchi sprey yordam beradi. Uning tarkibidagi spirt va silikon tufayli muz tezda eriydi. Aytgancha, zichlagichlar va qulflarga sovuq tushmasdan oldin ham ishlov berish mumkin, bu holda muammolarning oldini olish oson bo‘ladi.
Cho‘tka, qirg‘ich va belkurak
Avtomobil eshigi ochilgach, avtomobil ustini qordan tozalash uchun cho‘tka va muzni qirish uchun qirg‘ich kerak bo‘ladi. Ishni tezlashtirish uchun oynalarni erituvchi vosita yordam beradi.
Shuningdek, belkurak olib yurish maqsadga muvofiq — shunda qorni tozalash ancha kam vaqt va kuch talab qiladi. Albatta, katta kurak tezroq yordam beradi, ammo buklama kichik varianti ham ish beradi.
O‘t oldirish simlari yoki avtonom ishga tushirish qurilmasi
Endi avtomobil motorini ishga tushirish qoldi. Sovuqdan quvvati tugagan akkumulyatorni boshqa mashina yordamida o‘t oldirish mumkin, bunda haydovchiga yuqori kuchlanishli simlar kerak bo‘ladi.
Agar puxta tayyorgarlik ko‘rilsa, boshqalarning yordamisiz o‘t oldirish variantini tanlagan ma’qul. Buning uchun sizda avtonom ishga tushirish qurilmasi bo‘lishi lozim. Sig‘imi 14 000 mA/soat bo‘lgan bunday gadjet uchtagacha akkumulyatorni o‘t oldira oladi.
Kimyoviy isitkichlar, pauerbanklar va fonar
Uzoq safarlarda, ayniqsa kechasi yo‘lda qolib ketish ehtimoli bo‘lganda avtonom energiya, issiqlik va yorug‘lik manbalarini olib yurish kerak. Agar motor biror sababga ko‘ra o‘chib qolsa, smartfoningiz quvvati tugab qolmasligi uchun pauerbank asqatodi. Fonar esa yorug‘lik bilan ta’minlaydi, sovib borayotgan avtomobilda esa isinish uchun kimyoviy isitkichlar to‘plami yordam beradi.
Suv o‘tkazmaydigan qo‘lqoplar va yopinchiq
Bunday narsalarga ko‘pchilik e’tibor bermaydi. Oynalarni qordan tozalash, g‘ildirakni almashtirish, motorni tekshirish yoki mashinani chuqurdan chiqarishda o‘zingizni sovuq va loydan himoya qilsangiz, ish osonroq kechadi. Bunday paytda issiq rezinali qo‘lqoplar va zaxira nimcha yoki kurtka juda asqotishi mumkin. Ayniqsa, doim mashinada yurib, qishki kiyim kiymaydiganlar uchun bu juda muhim.
Izoh (0)