O‘zbekiston Markaziy banki Islomiy moliyaviy xizmatlar kengashiga aʼzo bo‘ldi. Bu haqda bank matbuot xizmati xabar berdi.
Kengash faoliyati islomiy moliya institutlarini tartibga solish va nazorat qilish bo‘yicha xalqaro standartlarni ishlab chiqish, samarali korporativ boshqaruv mexanizmlari va risk-menejment tizimini joriy qilish, shuningdek, mazkur sohada kadrlar salohiyatini oshirish, tadqiqotlar olib borish hamda ushbu masalalarda kengashga aʼzo tashkilotlarga ko‘maklashishga qaratilgan.
Xabarda ta’kidlanishicha, mazkur tashkilotga aʼzolik boshqa mamlakatlar tajribasini o‘rganish va O‘zbekistonda islomiy moliya institutlari faoliyatini tartibga solish va nazorat qilish sohasida ilg‘or xalqaro tajribani joriy etish imkonini beradi.
Islomiy moliyaviy xizmatlar kengashi 2002-yilda tashkil etilgan bo‘lib, bosh ofisi Kuala-Lumpurda (Malayziya) joylashgan. Bugungi kunda kengashning 188 aʼzosi, shu jumladan, 81 ta tartibga solish va nazorat qiluvchi organlar, 10 ta xalqaro hukumatlararo tashkilot va 97 ta bozor ishtirokchilari hisoblanadi. Shuningdek, kengashga Qozog‘iston, Qirg‘iziston va Tojikiston moliyaviy regulyatorlari ham aʼzo hisoblanadi.
Islom moliyasi haqida
Islom moliyasi — moliyaviy xizmatlarni islom dini shariatiga muvofiq tashkillashtirib, uni mijozlarga axloqiy qadriyatlar asosida yetkazishdir. Ekspert Alijon Ravshanov Toshkentda o‘tkazilgan “Vatandosh” intellektual klubi muloqotida bu ham xuddi anʼanaviy moliya kabi yaxlit bir tizim ekanini ta’kidlagandi. O‘zini maxsus meʼyorlari, huquqiy normalari va anʼanaviy moliyadan katta farqlari bor. Islom moliyasida birinchi maqsad shariatga muvofiqlik hisoblanadi. Huquqshunos Husayn Rajabov islom moliyasi faqat banklardan iborat emasligi, u barcha moliyaviy munosabatlarni o‘zida jamlashini qayd etib o‘tgandi.
O‘zbekistonda islom moliyasi joriy etilishi natijasida qariyb 10 milliard dollarlik investitsiyalar jalb qilinishi, 100 mingdan ortiq yangi ish o‘rinlari yaratilishi mumkin.
O‘zbekistonda islomiy bank va moliya infratuzilmasini yaratish rejalari haqida 2018-yildan beri aytib kelinadi. 2023-yilning iyun oyida Toshkent shahrida o‘tkazilgan xalqaro forumda “Apex bank” boshqaruvi raisi Bahrom No‘monov: “O‘zbekiston aholisining 20 foizi diniy sabab bilan anʼanaviy kredit tizimidan foydalanmaydi”, deb aytgandi.
O‘zbekistonda islomiy moliyalash tizimini yo‘lga qo‘yish bo‘yicha qonun loyihasi ishlab chiqildi. Hujjat qabul qilinsa, qonunchilikka juda ko‘p o‘zgartirishlar kiritish talab etiladi.
Izoh (0)