Tojikistonning So‘g‘d viloyati Konibodom tumanida 20 dan ortiq kishi sirli ravishda o‘ldirib ketildi. Bosh prokuratura qotillikda gumonlanib to‘rt kishi hibsga olinganini ma’lum qildi. Bu haqda “Sputnik Tojikiston” xabar berdi.
Bir necha oilalarni o‘ldirishda gumonlanayotgan shaxslarga nisbatan jinoyat ishlari qo‘zg‘atilgan. Qamoqqa olingan to‘rtala shaxs ham 26 yoshdan 36 yoshgacha bo‘lgan erkaklar bo‘lib, ular Konibodamning Gulbog‘, Lohuti va Hamroboyev qishloq jamoatlarida tug‘ilgan.
Prokuratura tergovchilarning ishi mamlakat rahbariyati tomonidan bevosita nazorat qilinayotgani va tergov davom etayotganini ta’kidladi.
Eslatib o‘tamiz, Konibodomdagi qotilliklar zanjiri 2024-yilning aprel oyida boshlangan bo‘lib, bu voqealar bir-biriga bog‘liqmi yoki alohida hodisalarmi, hozircha noma’lum. Ushbu tumanda allaqachon 20 dan ortiq odam sirli tarzda halok bo‘lgan va hukumat hanuzgacha bu jinoyatlarni fosh eta olmayapti.
Yaqinda atigi 8 kun ichida tumandagi 10 nafar aholining jasadi zo‘ravonlik belgilari bilan topilgan. Shu munosabat bilan So‘g‘d viloyati hokimi Rajabboy Ahmadzoda Konibodom tumaniga borib, u yerdagi aholi bilan uchrashgan. U kuch ishlatuvchi va huquqni muhofaza qiluvchi tuzilmalar jinoyatlarni ochish va aybdorlarni jazolash uchun safarbar etilgani, jinoyatchilarni qidirishda barcha choralar ko‘rilayotganini ta’kidlagan.
Izoh (0)