Turkiya film va seriallari faqat sevgi sarguzashtlari va tarixiy dramalardan iborat deb o‘ylaydiganlar bu borada adashadi. Quyidagi qo‘rqinchli filmlar Gollivudning katta byudjetli dahshatli filmlaridan qolishmaydigan darajada har qanday odamni qo‘rqita oladi.
“Jahannam kaliti” (2015)
Mazkur kriminal drama markazida besh nafar politsiyachi turadi. Ularning barda pivo ichib o‘tirgan odatiy kechasi shoshilinch qo‘ng‘iroq tufayli uziladi. Qahramonlarga zudlik bilan o‘rmondagi tashlandiq uyni tekshirish topshirig‘i beriladi. Bu politsiyachilar uchun yangilik bo‘lmasa-da, bu safar ularni har birining gunohlari uchun tayyorlangan haqiqiy azob-uqubatlar kutmoqda.
“Meji” (2016)
“Meji” filmining asosini dahshat janridagi filmlar orasida keng tarqalgan syujet tashkil etadi — bosh qahramon Oliviya Nyu Yorkdan uyiga, Turkiyaga qaytib keladi va singlisi Marla homilador ekanligini, biologik otasi esa go‘yo yer yutganday g‘oyib bo‘lganini bilib qoladi. Shunday bo‘lsa-da, Marla bolani olib qolishga qaror qiladi. Bu qaror kutilmaganda tugab bitmas tungi dahshatlarga sabab bo‘ladi.
“Go‘zal ayol portreti” (2019)
Bosh qahramon Nisoning hayotiga havas qilish mumkin: u eri bilan birga kichik shaharchada qizini tarbiyalaydi. Ammo otasining vafoti haqidagi xabar uning hayotini o‘zgartirib yuboradi. Tug‘ilib-o‘sgan qishlog‘iga qaytgan Niso o‘z o‘tmishining qorong‘i sirlariga duch keladi va asta-sekin aqldan ozayotganini his qila boshlaydi.
“Uy bekasi” (2017)
“Uy bekasi” filmining syujeti Xolli atrofida rivojlanadi. Uning odatiy hayoti vaqti-vaqti bilan gallyutsinatsiyalar tufayli izdan chiqadi — ko‘p yillar oldin uning ko‘z o‘ngida singlisi va otasi o‘ldirilgandi. Bir kuni eski dugonasi Xollini eri bilan ziyofatga taklif qiladi. Bu tadbir uni bir muddat bo‘lsa-da, xavotirli fikrlardan xalos etishiga ishongan Xolli taklifni qabul qiladi. Biroq o‘sha tunda gallyutsinatsiyalar yana paydo bo‘la boshlaydi.
“Dabbe: Jinlar qarg‘ishi” (2013)
Syujet markazida to‘yiga tayyorgarlik ko‘rayotgan, ammo kutilmaganda qachonlardir noma’lum sirli mavjudotga bog‘liqligini bilib qolgan Kubro turadi. Kubroning psixiatr do‘sti unga yordam berishga qaror qiladi va ekzortizm marosimini o‘tkazadi, ammo bu vaziyatni yanada yomonlashtiradi.
Izoh (0)