Ijtimoiy tarmoqlarda Bekobodning “Metallurg” klubi Superligada ishtirok etmasligi muhokama qilinmoqda. O‘zbekiston Professional futbol ligasi holat bo‘yicha bayonot berdi.
Maʼlum qilinishicha, jamoaning Superligada ishtirok etishi yoki etmasligi masalasida klub yoki uning taʼsischisi O‘zPFLga xabar bermagan. PFL “Metallurg” 7 nafar asosiy futbolchi bilan mavjud mehnat shartnomasini bekor qilgani, bir necha futbolchi klub bilan shartnomasi yakuniga yetgani uchun erkin agentga aylangani, shuningdek, 10-dekabr kuni “Metallurg” MCHJ PFK yagona ishtirokchisining 1-sonli navbatdan tashqari umumiy yig‘ilishi o‘tkazilib, klub direktori Shavkat Saidov lavozimidan ozod etilgani haqida biladi.
Taʼkidlanishicha, mazkur masalaga oydinlik kiritish maqsadida O‘zPFL “O‘zmetkombinat” AJga rasmiy murojaat bilan chiqib, “Metallurg”ning Superligadagi ishtiroki masalasiga 24-dekabrga qadar oydinlik kiritishni so‘ragan.
O‘zPFL agar “Metallurg” musobaqada ishtirok etmasa, uning o‘rni qanday to‘ldirilishi bo‘yicha tushuntirish berdi.
Agar “Metallurg” klubi Superligada ishtirok etish huquqidan voz kechsa, reglament bo‘yicha uning o‘rni mavsum yakuniga ko‘ra keyingi o‘rinni egallagan va litsenziyalash talabiga javob beradigan boshqa futbol klubi bilan to‘ldirilishi lozim. Mana shu nuqtada Liga Superliga uchun o‘tish o‘yiniga eʼtibor qaratadi. Sir emaski, Superligaga yo‘llanma beruvchi so‘nggi o‘yinda “Metallurg” va “Olimpik” jamoalari o‘zaro kurash olib bordi. Shundan kelib chiqilsa, “Metallurg”ning o‘rnini egallashi mumkin bo‘lgan keyingi klub “Olimpik” hisoblanadi.
Agar “Olimpik”da moliyalashtirish va boshqa masalada muammo o‘rtaga chiqsa, Liga u holda reglamentning 10.2-bandiga murojaat qiladi. Proliga mavsumi yakuniga ko‘ra dastlabki to‘rt o‘rinni qo‘lga kiritgan klublar Superliga yo‘llanmasiga ega chiqdi. 5-o‘rindan joy olgan “Aral” esa OFK litsenziyasini qo‘lga kirita olmagan. Biroq 6-o‘rinni band qilgan “Xorazm”da litsenziya mavjud. Yaʼni, Superliga uchun “Olimpik”dan keyingi nomzod “Xorazm” hisoblanadi.
Shu nuqtada OAV tomonidan tilga olinayotgan “Lokomotiv” masalasiga ham to‘xtalish mumkin. Jamoa Superligada so‘nggi o‘rinni egallab, Proligaga yo‘l olgan. “Lokomotiv” 2025-yilgi mavsumni Superligada o‘tkazishi uchun yuqoridagi ketma-ketlik amalga oshishi lozim. Yaʼni, birinchi galda “Metallurg” Superligada o‘ynash huquqidan voz kechishi, keyinchalik “Olimpik” va undan keyin “Xorazm” klubi bunday imkoniyatga ega bo‘lmasligigina “Lokomotiv” uchun yo‘l ochadi. Bu masala Liga Ijroiya qo‘mitasining yig‘ilishida ko‘rib chiqilishi kerak bo‘ladi, deyiladi bayonotda.
Izoh (0)