Ba’zan rejissyorlar o‘z asarlarida maxfiy ishoralar qoldirishadi, ular orqali ziyrak tomoshabin voqealar rivojini oldinroq fahmlashi yoki qo‘shimcha ma’lumotlarni bilib olishi mumkin. Bundan tashqari, film ijodkorlari ba’zan asarlarini yanada jozibador qiladigan detallarga ham e’tibor qaratishadi.
“Jangchilar klubi”
Diqqatli tomoshabinlar film ijodkorlari barcha ma’lumotlarni oshkor qilishidan oldin asar yakunini taxmin qilishlari mumkin. Hikoyachi uyidan ayrilgandan so‘ng, Taylerga taksofondan qo‘ng‘iroq qiladi. Dastlab hech kim javob bermaydi, ammo bir necha soniyadan so‘ng telefon jiringlay boshlaydi. Ayni shu daqiqada “Kiruvchi qo‘ng‘iroqlarni qabul qilish imkonsiz” degan yozuvni ko‘rish mumkin. Boshqacha aytganda, Tayler unga qayta qo‘ng‘iroq qila olmasdi, chunki telefon qo‘ng‘iroqlarni qabul qilolmasdi.
“Jinoiy asar”
Filmda Vinsent va Mia tanlovda raqsga tushishadi, keyin esa go‘yoki ular kubok yutib olishadi. Aslida esa uni o‘g‘irlab ketishgandi. Bu haqda keyinroq radio orqali xabar beriladi.
“Astral”
Filmda tomoshabinni yanada dahshatga soladigan bir lahza bor, lekin uni kamdan kam odam payqaydi. Syujetga ko‘ra, ona axlatni olib chiqadi, shu paytda mehmonxonada bolaning arvohi raqsga tushadi. Ammo e’tiborli tomoshabinlar uni oldingi sahnada ham ko‘rishi mumkin. U xonaning burchagida, kiyim ilgich yonida turardi.
“Katta Lebovski”
Film bosh qahramoni Chuvakning deyarli har bir sahnada mavjudligini kam odam payqagan. Hatto bir qarashda yo‘q bo‘lgan joyda ham. Filmda nemis nigilistlari qahvaxonada o‘tirgan kadr bor. Shu payt derazadan Uolterning furgoni o‘tib ketayotganini, unda Chuvakning o‘zi ham o‘tirganini ko‘pchilik sezmagan ham.
“Kelajakka qaytib”
“Kelajakka qaytib” filmida rejissyor doktor Braunning dohiyona iste’dodini ko‘p bor ta’kidlagan. Kamdan-kam kishi 1955-yilda dok yopishqoq tasmali poyabzal yaratganiga e’tibor qaratgan (uning davrida bunday poyabzallar endigina ishlab chiqarila boshlangan edi). Ehtimol, u buni Martining poyabzalini sinchiklab o‘rganib chiqqandan so‘ng amalga oshirgandir.
“Forrest Gamp”
Zukko tomoshabin butun komandadan faqat Forrestning formasi toza ekanini payqaydi. Chunki boshqa o‘yinchilar dam-badam o‘t ustida yumalab yotishar, Gampni esa hech kim tutib ololmasdi.
“Sokin joy”
“Sokin joy” filmi qahramonlari allaqachon tashlab ketilgan supermarketga kirganda, chipslar turgan javondan tashqari barcha javonlar bo‘m-bo‘sh bo‘ladi. Sababi oddiy: chipslar qirsillaydi, shuning uchun ularni tinchlikka rioya qilish kerak bo‘lgan dunyoda iste’mol qilish mumkin emas.
“Beshinchi element”
“Beshinchi element”da Nyu Yorkda bunday baland binolar qayerdan paydo bo‘ldi, deb o‘zingizga hech savol berganmisiz? Lyuk Besson okeanlardagi suv boshqa sayyoralarga yuborilishini shu yo‘l bilan tushuntiradi. Shuning uchun suv sathi pasaygan va binolar juda baland ko‘rinadi.
“Trumen tomoshasi”
“Trumen tomoshasi” kartinasida bosh qahramon vitaminlar qabul qiladi. U uchun bu juda muhim, chunki u hech qachon haqiqiy quyosh nurini ko‘rmagan. Bu kichik detal film puxta ishlanganini ko‘rsatadi.
“Ta’tillar almashganda”
Sahnalardan birida qahramonlar filmlar haqida suhbatlashayotganda, muhokama qilinayotgan kartinalardan birida o‘ynagan aktyor jilmayib qo‘yganini ko‘ramiz. Bu aktyor Dastin Xoffman bo‘lib, aslida u tasodifan suratga olish maydoniga kelib qolgan ekan. U yonidan o‘tayotib kameralarni ko‘rib qoladi. Film ijodkorlari bu vaziyatdan foydalanib, Yangi yil komediyasiga uni ham qo‘shishga qaror qilishadi.
Izoh (0)