13-dekabr kuni zamonamizning eng mashhur xonandalaridan biri Teylor Svift 35 yoshni qarshi oldi. Quyida uning yulduzlik maqomiga erishish yo‘li haqida so‘z boradi.
Dastlabki yillar: buyuk kelajakni orzu qilib
Teylor 1989-yilda Pensilvaniya shtatining Vayomissing shahrida tug‘ilgan. Svift hayotining birinchi yillarini ota-onasining Rojdestvo daraxtlari fermasida o‘tkazdi. U Alvernia Montessori maktabida maktabgacha ta’lim muassasasiga qatnadi, so‘ng Vaynderoft maktabiga o‘tdi.
9 yoshida Svift musiqali teatrga qiziqib qoldi va Berks Yoshlar teatr akademiyasining to‘rtta spektaklida ishtirok etdi. U muntazam ravishda Nyu Yorkka vokal va aktyorlik saboqlari uchun borib turdi. Keyinchalik Svift kantri musiqasiga e’tibor qaratdi.
U dam olish kunlarida mahalliy festival va tadbirlarda chiqish qildi. Faith Hill haqidagi hujjatli filmni tomosha qilgan xonanda musiqiy karyerasini davom ettirish uchun Tennessi shtatining Neshvill shahriga borishi kerakligiga ishonch hosil qildi.
Neshvillga ko‘chib o‘tish: muvaffaqiyat sari birinchi qadam
2004-yilda Teylor kantri musiqasining poytaxti Neshvillga onasi bilan ko‘chib o‘tdi. U yerda o‘smir qiz Dolly Parton va Diksi Chicks tomonidan karaoke uchun muqovalar bilan demo taqdim etdi. Biroq bu asar hech kimni ajablantirmadi. Unga o‘xshagan yosh xonandalar ko‘pligini aytishdi. Shunga qaramay Teylor leybl bilan shartnoma imzolashga va professional karyerasini boshlashga umid qildi. Bir yil o‘tgach, u Big Machine Records bilan shartnoma imzoladi, bu qadam uning musiqa sohasidagi buyuk sayohatining boshlanishi bo‘ldi.
Dastlabki muvaffaqiyatlar
Teylorga kantri musiqasini tushunishga yordam berish uchun otasi Neshvildagi Merrill Lynch ofisiga ko‘chib o‘tdi. Oila Tennessi shtatining Hendersonvill shahridagi ko‘l bo‘yidagi uyda yashay boshlaganida Teylor 14 yoshda edi.
Svift davlat o‘rta maktabda o‘qidi, so‘ng ikki yildan keyin Aaron akademiyasiga o‘tdi. Uyda ta’lim olgani tufayli u akademiyani bir yilda — juda erta tugatdi.
Teylor Sviftning 2006-yilda chiqqan birinchi albomi unga bir zumda mashhurlik keltirdi. “Love story”, “Tim McGraw” va “Our Song” kabi qo‘shiqlar xitga aylanib, yosh xonandaga ajoyib imkoniyatlar olamiga eshik ochdi.
Keyingi yillarda u “Fearless” (2008) va “Speak Now” (2010) kabi bir nechta muvaffaqiyatli albomlarini chiqardi. Har bir yangi rekord unga ko‘proq e’tirof va mashhurlik olib keldi.
Birinchi haftada yarim million nusxadan ortiq sotilgan “Fearless” albomi Billboard ro‘yxatida yuqori o‘rinlarni egalladi. “You Belong with Me” va “Trouble” kabi singllar ham butun dunyoda mashhur bo‘ldi.
Uslub evolyutsiyasi: yangi marralarni zabt etish
Vaqt o‘tishi bilan Teylor kantri uslubidan uzoqlashib, pop musiqasi ustida tajriba o‘tkaza boshladi. Uning “Red” (2012) albomi ijodida yangi davrni boshlab berdi. “We Are Never Ever Getting Back Together” qo‘shig‘i xalqaro hitga aylanib, Teylor har qanday janrda muvaffaqiyatli ishlay olishini isbotladi.
2010-yilda Svift o‘zining birinchi dunyo bo‘ylab turnesini boshladi. U Shimoliy Amerika bo‘ylab kichik joylarda konsert berdi. Xuddi shu yili u mukofotlar tanlovida ustunlik qildi. “Fearless” aprel oyida Country Music akademiyasi tomonidan yilning eng yaxshi albomi deb topildi.
Xonanda keyingi yilda ikkinchi pop-albomi — “Shake It Off ” ustida ishlay boshladi. Uning birinchi haftadagi sotuvi “Red” albominikidan oshib ketdi.
Mualliflik huquqi uchun kurash
Teylor faoliyati davomida ko‘plab qiyinchiliklarga duch keldi. Ulardan biri menejer Skuter Braun bilan uning qo‘shiqlari bilan bog‘liq mojaro edi. 2019-yilda u o‘z ijodlarini nazorat qilish maqsadida eski albomlariga boykot eʼlon qildi. Bu qadam Teylorning qat’iyati va mustaqil bo‘lishga intilishini isbotlab berdi.
Hayotning yangi bobi
Bu orada Svift millionlab tinglovchilarga yoqadigan qo‘shiqlarni chiqarishda davom etdi. “Lover” (2019) albomi uning super yulduz maqomini yana bir bor tasdiqladi. COVID-19 pandemiyasi paytida yozilgan “Folklore” (2020) albomi chiqqandan so‘ng xonanda yana bir bor barcha chartlarning eng yuqori pog‘onasiga qaytdi.
2021-yil mart oyining oxirida xonandaning ikkita singli taqdimoti birdaniga bo‘lib o‘tdi. Bu “You All Over Me” musiqiy kompozitsiyalari va “Love Story” remiksi edi. Ikkala trek ham yangi “LP Fearless” (Teylor Version) ga kiritildi.
2023-yilni o‘zining Eras nomli dunyo gastrollari bilan o‘tkazgan qo‘shiqchi Teylor Svift ilk bor Forbes’ning milliarder insonlar ro‘yxatiga kiritildi. U bu maqomga da’vogar Rossiya prezidenti Vladimir Putin va Xitoy rahbari Si Szinpinni ortda qoldirdi. Bugungi kunda xonanda Amerikaning Billboard jurnaliga ko‘ra 21-asrning eng buyuk pop yulduzlari reytingida 2-o‘rinda turibdi.
Bloomberg nashriga ko‘ra, uning musiqiy albom, konsertlar, gastrol va turli reklamalar orqali orttirgan boyligi 1,1 mlrd dollarni tashkil qiladi. Teylor tarixda musiqasidan milliard dollardan ko‘proq daromad olgan birinchi xonanda hisoblanadi.
Izoh (0)