Boks bo‘yicha og‘ir vazn toifasida sobiq mutlaq jahon chempioni, afsonaviy amerikalik Mayk Tayson ukrainalik Oleksandr Usik va britaniyalik Tayson Fyuri o‘rtasidagi revansh jangida kimga muxlislik qilishi haqida gapirdi.
“Usik — og‘ir vazn toifasida ayni damda dunyoning eng yaxshi bokschisi. Lekin men ushbu jangda Fyuri g‘alaba qozonishiga umid qilaman. Chunki men uning muxlisiman. Otasi unga mening ismimni qo‘ygan. Bunday vaqtda men uni tashlab qo‘ymayman”, deya Taysonning so‘zlarini keltiradi talkSPORT portali.
Eslatib o‘tamiz, Oleksandr va Tayson o‘rtasidagi jang 22-dekabr kuni Ar-Riyodda (Saudiya Arabistoni) bo‘lib o‘tadi. Ma’lumot uchun, 18-may kuni bo‘lib o‘tgan birinchi jangda Usik Fyurini hakamlar qaroriga ko‘ra ochkolar hisobiga mag‘lub etgandi.
16-noyabr kuni AQSHning Texas shtati, Arlington shahrida Mayk Tayson va Jeyk Pol o‘rtasidagi har biri ikki daqiqadan sakkiz raundga mo‘ljallangan professional maqomga ega boks jangi bo‘lib o‘tdi. To‘liq davom etgan bahsda Tayson mag‘lubiyatga uchragan edi.
Izoh (0)