2025-yilda muhtoj odamlarning jarrohlik amaliyoti uchun Tibbiy sug‘urta jamg‘armasiga qo‘shimcha 185 milliard so‘m ajratiladi. Bu haqda bugun, 13-dekabr kuni prezident Shavkat Mirziyoyev raisligida ijtimoiy himoya sohasida amalga oshirilgan ishlar va 2025-yildagi vazifalar yuzasidan o‘tkazilgan videoselektor yig‘ilishida maʼlum qilindi.
Taʼkidlanishicha, “Ijtimoiy daftarlar” mablag‘i faqat kambag‘al oilalarning yashash sharoitini yaxshilash, tibbiyot, taʼlim xizmatlarini ko‘rsatish va daromadini oshirishga sarflanadi. Adolat bo‘lishi uchun endilikda bu mablag‘lar tumandagi kambag‘allar soniga qarab taqsimlanadi.
Ijtimoiy daftarlar mablag‘ining 30 foizini tuman hokimlariga “Inson” markazlari bilan mahalladagi uy-joy, yo‘l, suv va elektrni yaxshilash uchun ishlatishga ruxsat beriladi.
Yana bir masala — hozirda 400 ta ko‘p qavatli ijtimoiy uyda 25 ming aholi istiqomat qiladi. Lekin ular yaqin qarindoshlari va odatiy yashash sharoitidan ancha uzoqlashib qolayotgani taʼkidlandi.
Shu munosabat bilan ehtiyojmand aholini bitta ijtimoiy uy-joyga joylashtirishdan voz kechiladi. Ularga o‘zini mahallasiga yaqin joydagi uyni ijaraga olishga ruxsat beriladi, xarajati qoplab beriladi, deyiladi Prezident matbuot xizmati xabarida
Ijtimoiy himoya agentligi direktori Mansur Olloyorovga bu borada tegishli topshiriqlar berildi.
Izoh (0)