Yangi yil munosabati bilan Toshkentning ayrim markaziy ko‘chalarida transport harakati cheklandi.
Poytaxt hokimligi matbuot xizmatining xabar berishicha, Yangi yil bayrami tadbirlariga tayyorgarlik ko‘rish va uni yuqori saviyada o‘tkazish, shuningdek, bayram tadbirlari vaqtida aholi xavfsizligini ta’minlash hamda jamoat tartibini saqlash maqsadida 2024-yilning 10-dekabridan 2025-yilning 15-yanvarigacha quyidagi ko‘chalarda avtotransport vositalari harakati cheklanadi:
- Zarafshon ko‘chasining Hyatt Regency Tashkent mehmonxonasi qo‘riqlash punkti va Matbuotchilar ko‘chalari oralig‘idagi qismi;
- Istiqlol ko‘chasining Amir Temur va Buyuk Turon ko‘chalari oralig‘idagi qismi;
- Buyuk Turon ko‘chasining Istiqlol ko‘chasi kesishmasidan Yoshlar ijod saroyigacha bo‘lgan qismida.
Ko‘rsatilgan davr mobaynida haydovchilarga muqobil yo‘llardan foydalanish tavsiya qilindi.
Bundan avval hokimlik Yangi yil bayrami munosabati bilan poytaxtda o‘rnatiladigan bayram archalari haqida ma’lumot bergandi. Asosiy archa Alisher Navoiy nomidagi O‘zbekiston Milliy kutubxonasining old maydonida tashkil qilinib, 25-dekabr — 10-yanvar kunlari soat 11:00 dan 23:00 gacha tashrif buyuruvchilarni qabul qiladi.
Izoh (0)