Prezidentning “ ‘G‘elon’ turistik-rekreatsion zonasini va xalqaro umummavsumiy kurortni tashkil etish chora-tadbirlari to‘g‘risida”gi qarori qabul qilindi. Bu haqda O‘zA xabar berdi.
Unga ko‘ra, Qashqadaryo viloyati, Shahrisabz tumanida umumiy yer maydoni 2,9 ming gektar bo‘lgan “G‘elon” turistik-rekreatsion zonasi tashkil etiladi.
Turistik zona hududida zamonaviy mehmonxona majmualari, madaniy-sog‘lomlashtirish, savdo-ko‘ngilochar va turistik ahamiyatdagi boshqa obyektlar hamda muhandislik infratuzilmalari barpo etiladi.
Turistik zona faoliyat ko‘rsatish muddati keyinchalik uzaytirish imkoniyati bilan 30 yilga tashkil qilinadi. 2025-yil 1-iyunga qadar turistik zonaning bosh rejasi va batafsil rejalari loyihalari ishlab chiqiladi.
Umumiy uzunligi 33 km bo‘lgan Hisorak—G‘elon, Hisorak—Sarchashma avtomobil yo‘lini ikki tasmali qilinib, Chiroqchi—Sho‘rquduq avtomobil yo‘lining 30 km qismida qurilish va rekonstruksiya ishlari amalga oshiriladi.
2025-yil 1-aprelga qadar turistik zona brendi yaratilib, respublika hududida hamda xorijiy davlatlarda keng targ‘ib qilinadi.
3-iyun kuni Shavkat Mirziyoyev raisligida turizmni yanada rivojlantirish bo‘yicha ustuvor masalalar yuzasidan videoselektor yig‘ilishi va sohadagi tadbirkorlar bilan muloqot o‘tkazilgandi. Unda xorijiy investorlar Shahrisabz tumani G‘elon va Sarchashma qishloqlari orasida 3 ming gektarlik tog‘-chang‘i kompleksini va Miraki qishlog‘ida turizm zonasini barpo etish ishlarini boshlangani aytilgandi.
Izoh (1)
Assalomu aleykum kimdir usha Gelon qishlogi Sarchashma qishloqlarini aholisi shunga rozimikan deb suhbatini ogan ekanmi axir qishlogimizga hej kim bunga rozi emasku hech kim shunchaki necchi yillik qigan mehnati bog’u rog’ini chiqarib bergisi kelmaydiku bizni qishlog’imiz usha bog’larini ustidan non topib yashayapti daryo uz muxbirlari bunga ezohlik keltirasilami?