Forbes’ga ko‘ra 2024-yilda dunyoning eng badavlat ayol xonandasi, amerikalik pop-yulduz Teylor Svift keyingi bir yil ichida karyerasida tanaffus olishini e’lon qildi, deb yozadi People talk.
U ikki yil uzluksiz davom etgan The Eras Tour gastrol safarlaridan qattiq charchagan va salomatligini tiklash uchun 2025-yilda konsert qo‘ymaslikka qaror qilgan.
Teylor Svift 2023-yil mart oyidan 2024-yilning dekabrigacha 150 marta turli davlatlarda chiqish qildi. Beshta qit’a bo‘ylab qo‘yilgan The Eras Tour konsertlari va qo‘shiqlari asosida Svift milliarderlar reytingidan o‘rin oldi.
“Teylor juda toliqqan. Xonanda to‘liq hordiq chiqarish va resurslarini tiklash uchun yangi yilni intiqlik bilan kutmoqda”, deya qayd etdi US Weekly nashri.
Svift daromadi 2,5 milliard dollarga yetgan dunyodagi barcha musiqachilar orasida ikkinchi o‘rinda. U 14 karra “Gremmi” mukofoti sovrindori bo‘lib, ulardan to‘rttasi “Yilning eng yaxshi albomi” nominatsiyasi uchun berilgan. Rolling Stone va Billboard ma’lumotlariga ko‘ra, Teylor Sviftning qo‘shiqlari barcha davrlarning eng yaxshi qo‘shiqlari va albomlari ro‘yxatiga kiritilgan.
Izoh (0)