Moskvada o‘tkazilishi rejalashtirilgan va Olimpiya o‘yinlariga muqobil deb ko‘rilayotgan Do‘stlik o'yinlari noma’lum muddatga qoldirildi. Rossiya Prezidenti Vladimir Putin bu haqdagi farmonni 2-dekabr, dushanba kuni rasmiy huquqiy axborot portalida e’lon qildi.
Hujjatga ko‘ra, dastlab Moskva va Yekaterinburg shaharlarida 2024-yil 15-29-sentyabr kunlari o‘tkazilishi kerak bo‘lgan, keyinchalik 2025-yilga ko‘chirilgan Do‘stlik o‘yinlari maxsus ko‘rsatmaga qadar qoldiriladi. Bunday qaror sportchilarning va sport tashkilotlarining xalqaro sport faoliyatida erkin ishtirok etish huquqlarini himoya qilish zarurati bilan izohlangan. Putin farmonida aniq sabablar ko'rsatilmagan.
Do‘stlik o‘yinlarini Olimpiya o‘yinlari yilida o‘tkazish qarori Rossiya sportchilarining Ukraina urushi tufayli xalqaro musobaqalardan chetlatilishiga javoban e’lon qilingan edi. Putin bu borada tegishli farmonni 2023-yil oktyabr oyida imzolagan.
Xalqaro Olimpiya Qo‘mitasi (XOQ) ushbu tashabbusni tanqid qilib, uni Moskvaning “sportni siyosiylashtirishga bo‘lgan kinoya bilan qilingan urinish”i deb atadi. XOQ sportchilarni Do‘stlik o‘yinlarida qatnashmaslikka chaqirdi.
Izoh (0)