O‘zbekistonlik bokschi Isroil Madrimov super yarimo‘rta vazn toifasida sobiq WBA chempioni galdagi 2 jangi haqida gapirdi.
Bokschi “Olamsport” saytiga bergan kichik intervyusida bo‘lajak ikki raqibi — ukrainalik Sergey Bogachuk hamda amerikalik WBC Interim kamari sohibi Verjil Ortisga qarshi kechadigan janglari haqida fikr bildirdi.
“Hozirda tayyorgarlik davom etyapti. Ko‘ramiz, hozircha aniq bir qarorga kelmadik. Asosiy fokus, yaʼni eʼtibor Bogachukka qaratilgan. Birinchi navbatda, aynan ukrainalik bokschi. Ikkala raqibim ham kuchli. Ikkisining o‘zaro o‘tkazgan jangini ko‘rdim. Har ikkisi ham teng jang qilgan. Verjil bilan o‘z vaqtida sparring ham o‘tkazganmiz. To‘g‘ri, qiyin raqib, lekin tayyorgarlik ko‘rib, yutsa bo‘ladi. Qiziq jang bo‘ladi”, dedi Madrimov.
O‘zbekistonlik bokschining Sergey Bogachuk bilan jangi 21-dekabr, Verjil Ortis bilan bahs esa 2025-yilning 22-fevral kuni o‘tkazilishi rejalashtirilgan. Ikki jang ham Saudiya Arabistonining Ar-Riyod shahrida bo‘lib o‘tadi.
Maʼlumot uchun, 29 yoshli Isroil Madrimov hozirga qadar 12 ta jang o‘tkazib, 10 ta g‘alaba, 1 ta mag‘lubiyat va 1 ta durang qayd etgan. Ukrainalik 29 yoshli Sergey Bogachuk (24-2-0) esa o‘zining oxirgi jangini Verjil Ortisga qarshi o‘tkazib, imkoniyatni boy bergan.
26 yoshli Verjil Ortis Junior hisobida esa 22 ta g‘alaba bor. U so‘nggi jangida Madrimovning bo‘lajak raqibi Bogachukni ochkolar hisobiga ko‘ra taslim etgandi.
Izoh (0)