O‘zbekistonda mahkumlar uchun elektron braslet ishlab chiqarish choralari ko‘rilmoqda. Bu haqda AOKAda o‘tkazilgan brifingda Kriminologiya tadqiqot institut boshlig‘i polkovnik, yuridik fanlari doktori Baxtiyor Berdialiyev ma’lum qildi.
Uning aytishicha, Kriminologiya institutida bajarilgan ilmiy-tadqiqot loyihasi natijasida uy qamog‘i ehtiyot chorasi va ozodlikni cheklash jazosi tayinlangan shaxslarni masofaviy nazorat qilishga mo‘ljallangan metodika, elektron braslet qurilmasi va dasturiy ta’minot ishlab chiqilib, intellektual mulk obyekti hujjatini (patent) olish, elektron brasletni ishlab chiqarish va tijoratlashtirish bo‘yicha kompleks choralar amalga oshirilmoqda.
Elektron braslet haqida
Elektron kuzatuv vositasi (elektron braslet) — ozodlikni cheklash tarzidagi jazoga hukm qilingan shaxsni masofadan turib nazorat qilishga mo‘ljallangan, qo‘lga yoki oyoqqa taqiladigan elektron qurilma.
2022-yilda jinoyat sodir etganlikda gumon qilinib ushlab turilgan, o‘ziga nisbatan qamoqqa olish tarzidagi ehtiyot chorasi qo‘llanilgan shaxslar va mahkumlarning qochish holatlarining oldini olish maqsadida elektron brasletdan foydalanish tizimi joriy etilishi ma’lum qilingandi.
2024-yilning avgustida prezident “Probatsiya to‘g‘risida”gi qonunni imzoladi. Unga ko‘ra, elektron kuzatuv vositasi (elektron braslet) ozodlikni cheklash tarzidagi jazoni o‘tash tartibi talablarini bajarmayotganligi to‘g‘risida rasmiy ravishda ogohlantirilgan yoki ozodlikni cheklash tarzidagi jazoni o‘tash davrida jamoat tartibini buzish bilan bog‘liq huquqbuzarliklar uchun maʼmuriy javobgarlikka tortilgan probatsiya nazoratidagi shaxsga nisbatan tuman (shahar) probatsiya bo‘linmasi boshlig‘ining qarori asosida qo‘llaniladi.
2024-yil aprelda Uy qamog‘i ehtiyot chorasi va ozodlikni cheklash jazosi qo‘llanilgan shaxslarni masofaviy nazorat qilish tartibini joriy etish chora-tadbirlari to‘g‘risida hukumat qarori loyihasi e’lon qilindi.
Mazkur loyihaning dastlabki tahriri bo‘yicha Oliy sudning takliflari (2024-yil 29-yanvardagi xatida 4 ta taklif bildirilgan), ikkinchi tahriri bo‘yicha Oliy sud (2024-yil 14-fevraldagi xatida 2 ta taklif bildirilgan), Bosh prokuratura (2024-yil 18-fevraldagi xatida 4 ta taklif bildirilgan) va Sog‘liqni saqlash vazirligi (2024-yil 16-martdagi xatida 1 ta taklif bildirilgan) ning takliflari o‘rganilgan hamda ularning barchasi inobatga olinib, loyiha takomillashtirilgan.
Qayd etilishicha, IIV Jamoat xavfsizligi masalalari ilmiy-amaliy tadqiqotlar markazida ilmiy-tadqiqot ishlariga davlat buyurtmasi asosida amaliy ilmiy-tadqiqot loyihasi bajarilgan, loyiha natijasida elektron braslet yaratilib, uning dasturiy ta’minoti ishlab chiqilgan.
Respublikaning 14 ta hududida (Qoraqalpog‘iston Respublikasi, Toshkent shahar va viloyatlar ichki ishlar organlari jamoat tartibini saqlash, huquqbuzarliklar profilaktikasi, probatsiya xizmatlarida) sinovdan o‘tkazilib, amaliyotga joriy etishga tayyor holatga keltirilgan.
Izoh (0)