Buxoro shahrining tarixiy qismida skuter va mopedlar harakati cheklandi. Bu haqda “O‘zbekiston 24” telekanali xabar berdi.
“Eski shahar qismida avtomashinalar harakati cheklangan bo‘lsa-da, moto-avto vositalar, skuterlar, mopedlardan keng foydalaniladi. Ammo ularning ham qatnovi tarixiy merosga zarar yetkazishi, qolaversa bu hududda harakatlanayotgan ko‘plab sayyohlar va mahalliy aholi vakillariga xavf tug‘dirishi mumkin”, deyiladi telekanal lavhasida.
Shu sabab endilikda Buxoro shahrining tarixiy qismida bunday transport vositalarining harakatlanishi cheklanmoqda. Yo‘l harakati xavfsizligi boshqarmasi tomonidan ogohlantiruvchi yo‘l belgilari o‘rnatilmoqda.
Bu kabi transport vositalarida harakatni taqiqlovchi yo‘l belgilari bor joyda harakatlanish ma’muriy javobgarlikka sabab bo‘ladi.
2024-yilning oktyabrida prezident tomonidan imzolangan qonun bilan Maʼmuriy javobgarlik to‘g‘risidagi kodeksga o‘zgartirish va qo‘shimchalar kiritilgandi. Kodeksning yangilangan 138-moddasiga (piyodalar va boshqa yo‘l harakati ishtirokchilari tomonidan yo‘l harakati qoidalarini buzish) ko‘ra, skuterlar va shaxsiy harakatlanish vositalarini (mopedlar va velosipedlar, ot-aravalarni boshqarayotgan va yo‘ldan foydalanuvchi boshqa shaxslar kabi) boshqarayotgan shaxslar tomonidan yo‘l harakatini tartibga soluvchi signallarga bo‘ysunmaslik, ustunlik yo‘l belgilari, taqiqlovchi yoki ko‘rsatma beruvchi yo‘l belgilari talablariga rioya qilmaslik BHMning uchdan bir qismi (125 ming so‘m) miqdorida jarima solishga sabab bo‘ladi.
2023-yil avgustida madaniy meros obyektlari joylashgan ko‘chalarda og‘irligi 5 tonnadan ortiq bo‘lgan yuk mashinalari harakatlanishi taqiqlangandi.
Izoh (0)