Andijon viloyatida niqob taqib olgan shaxslar avtomobilga tosh otib, hujum qilgani aks etgan video tarqalgandi. Viloyat prokuraturasi bosqinchilik yuzasidan jinoyat ishi qo‘zg‘atilganini ma’lum qildi.
Aniqlanishicha, 2024-yil 20-noyabr kuni fuqaro Yu.D. va boshqalar oldindan jinoiy til biriktirib, bir guruh bo‘lib, fuqaro L.A.ni boshqaruvida bo‘lgan Cobalt avtomashinasida pul mablag‘larini tashish bilan shug‘ullanishini bilib, unga hujum qilib, pullarni qo‘lga kiritishni reja qilgan.
Ular Lacetti va Cobalt avtomashinalari davlat raqam belgilarini yechib olib, orqasidan kuzatib kelgan. So‘ng yuzlariga niqob taqqan holda Andijon shahrining “Yoyilma” mahallasi Amir Temur shohko‘chasidan o‘tgan Andijon—Asaka yo‘nalishidagi transport qatnov yo‘lining Andijon yo‘nalishi bo‘yicha yo‘l chetida to‘xtab turgan L.A. avtomashinasiga tosh otib, hujum qilgan.
L.A. avtomashinasida hodisa joyidan qochgani sababli jinoyatni o‘zlariga bog‘liq bo‘lmagan holda oxiriga yetkaza olmagan.
Mazkur holat bo‘yicha Jinoyat kodeksining 164-moddasi 2-qismi “b” bandi (bosqinchilik, bir guruh shaxslar tomonidan oldindan til biriktirib) bilan jinoyat ishi qo‘zg‘atilib, Yu.D. protsessual tartibda ushlangan.
Ayni paytda jinoyat ishi bo‘yicha ichki ishlar organi tomonidan dastlabki tergov harakatlari olib borilmoqda. Viloyat prokuraturasi tomonidan ushbu jinoyat ishi ustidan prokuror nazorati o‘rnatilgan.
Izoh (0)