“O’zbekiston texnologik metallar kombinati” AJ va Istanbul texnika universiteti o‘rtasidagi kelishuvga asosan Markaziy Osiyo universiteti qoshida Texnologik metallar oliy maktabi tashkil etiladigan bo‘ldi. Bu haqda “O‘zbekiston texnologik metallar kombinati” AJ matbuot xizmati “Daryo”ga ma’lum qildi.
Aytilishicha, ushbu oliy maktabning vazifasi texnologik metallar sohasida magistratura va doktorantura talabalarini, ilmiy tadqiqotchilarni yetishtirib chiqarishdan iborat. Shuningdek, ilmiy materiallar va ma’lumotlar almashinuvini yo‘lga qo‘yish, tog‘-kon ishlari, metallurgiya, materialshunoslik, nanotexnologiya hamda energetika bo‘yicha qo‘shma tadqiqotlarni olib borish ko‘zda tutilgan.
Texnologik metallar oliy maktabi dual ta’lim tamoyiliga asoslangan bo‘lib, unga ko‘ra talabalar 70-80 foiz vaqtini ishlab chiqarish korxonalarida (ya’ni amaliyotda) o‘tkazadi.
Mazkur maktabni bitirgan bitiruvchilar kelgusida “O‘zbekiston texnologik metallar kombinati” AJ qoshidagi korxonalarda o‘z faoliyatlarini olib borishlari mumkin bo‘ladi.
Ma’lumot uchun, Istanbul texnika universiteti dunyodagi uchinchi eng qadimgi muhandislik universitetlaridan biri hisoblanadi. Universitetda 39 ta bakalavr, 144 ta magistratura dasturlari, 13 ta kollej, 346 ta laboratoriya va 12 ta ilmiy markazlar mavjud.
Izoh (0)