O‘zbekistonda tibbiyot sohasini transformatsiya qilishda turkiyalik mutaxassislar yaqindan ko‘mak beradi. Bu haqda Sog‘liqni saqlash vazirligi matbuot xizmati xabar berdi.
“Hozir O‘zbekiston tibbiyotida keng ko‘lamli transformatsiya jarayonlari davom etmoqda. Prezidentimiz bu borada sog‘liqni saqlash tizimi mutasaddilari oldiga tegishli vazifalarni qo‘ygan. Xususan, aholiga ko‘rsatilayotgan tibbiy xizmatlar sifatini jahon standartlari darajasiga olib chiqish — eng asosiy talablardan biri. Buning uchun esa, birinchi navbatda, xalqaro tajribani chuqur o‘rganish va amaliyotga samarali tatbiq etish talab etiladi”, deyiladi vazirlik xabarida.
Qayd etilishicha, shu ehtiyojdan kelib chiqib, hukumat qaroriga ko‘ra, Sog‘liqni saqlash vazirligi tomonidan turkiyalik mutaxassislar guruhi jalb etildi. Hozir xorijlik ekspertlar O‘zbekistonlik vakillari bilan hamkorlikda barcha bo‘g‘indagi tibbiyot muassasalarida o‘rganishlar olib bormoqda. Shu maqsadda tuzilgan ishchi guruhlar tasdiqlangan reja asosida hududlarda bo‘lyapti.
Turkiyalik mutaxassislar yettita yo‘nalish bo‘yicha ish olib bormoqda:
- birlamchi tibbiy-sanitariya yordamini takomillashtirish,
- tibbiy sug‘urta tizimini joriy etish va tizimni raqamlashtirish,
- shifoxonalarda tibbiy xizmatlar samaradorligini oshirish,
- tibbiy xizmatlarni rejalashtirish,
- farmatsevtikani rivojlantirish va dori vositalari ta’minoti,
- tibbiy asbob-uskunalar samaradorligini oshirish,
- shoshilinch va tez tibbiy yordamni rivojlantirish.
Turkiyadan taklif etilgan mutaxassislar soni ham yetti nafar. Ular yuqoridagi yettita yo‘nalish bo‘yicha katta xalqaro tajriba va malakaga ega ekspertlar. Har biri tegishli yo‘nalish bo‘yicha mas’ul etib belgilangan.
Jumladan, guruh rahbari — Hasan Chagil 1986-yilda Istanbul universitetini tamomlagan. 2003—2013-yillarda Turkiya tibbiyotini transformatsiya qilishda bevosita ishtirok etib, asosiy yo‘nalishlarga boshchilik qilgan. Natijada qisqa muddatda mamlakat tibbiyoti 2000-yillar boshidagi ahvoli og‘ir sohadan rivojlangan tizimga aylandi.
“Ayni paytda doktor Hasan Chagil O‘zbekiston sog‘liqni saqlash tizimini transformatsiya qilishga ko‘maklashish maqsadida tibbiy sug‘urta tizimini joriy etish yo‘nalishi bo‘yicha ish olib boryapti. Shu bilan birga, turkiyalik ekspertlar safida tibbiyot sohasida katta ilmiy salohiyat hamda amaliy tajribaga ega Mehmet Ugurlu, Talgan Kyuchyuk, Muhammet Yornek, Mehmet Ersoy, Hasan Bagdji va Mexmut Avdji ham bor”, deyiladi xabarda.
Hozir ular joylarda bo‘lib, sog‘liqni saqlash muassasalari faoliyatini chuqur o‘rgangan holda, uni yanada rivojlantirish borasida o‘z tavsiyalarini beryapti. Kelgusida ana shu tahlil, taklif va tavsiyalar umumlashtirilib, sog‘liqni saqlash tizimining bosqichma-bosqich islohotiga oid qisqa, o‘rta va uzoq muddatli “Yo‘l xaritalari” ishlab chiqilishi va amalga oshirilishi rejalashtirilgan.
Shavkat Mirziyoyev 20224-yil 9-noyabr kuni sog‘liqni saqlash sohasi xodimlariga yo‘llagan bayram tabrigida aholi salomatligiga e’tiborni kuchaytirish orqali inson qadrini oshirish, uning hayotiy manfaatlarini ta’minlashga qaratilgan muhim ishlar ham izchil davom ettirilishini ta’kidlagandi.
“O‘zbekiston – 2030” strategiyasi doirasida tibbiyot sohasida ham katta o‘zgarishlarni amalga oshirishni reja qilingan.
Izoh (0)