2024-yilning 1-8-dekabr kunlari Malayziyaning Kuala-Lumpur shahrida kar va zaif eshituvchilar o‘rtasida 10-Osiyo va Tinch okeani o‘yinlari o‘tkaziladi. Ushbu nufuzli musobaqada surdlimpiya sport turlari bo‘yicha (eshitishda nuqsoni bor sportchilar) O‘zbekiston milliy terma jamoasi ham ishtirok etadi.
Futbol bo‘yicha kar va zaif eshituvchilar O‘zbekiston milliy terma jamoasi
Ijtimoiy himoya milliy agentligi huzuridagi Ijtimoiy inspeksiya matbuot xizmati bo‘lim boshlig‘i Oybek Boltaboyevning “Daryo”ga ma’lum qilishicha, to‘qqizta yo‘nalish bo‘yicha o‘tkazilish rejalashtirilgan musobaqalarda qirq nafar o‘zbekistonlik sportchilar taekvando, yunon-rum va erkin kurash, dzyudo yo‘nalishlari bo‘yicha mamlakatimiz sharafini himoya qiladilar. Shuningdek, futbol terma jamoasi ham ishtirok etadi.
“Ayni paytda musobaqalarga qizg‘in tayyorgarlik ko‘rilmoqda. Sportchilar bilan respublikamizning kuchli murabbiylari mashg‘ulotlar olib bormoqda. Jarayonlarni Sport vazirligi, Ijtimoiy inspeksiya, Paralimpiya qo‘mitasi hamda O‘zbekiston karlar sport federatsiyasi tomonidan nazorat qilib borishi bilan birga, yetarlicha sharoit va imkoniyatlar yaratilmoqda. O‘ylaymizki, sportchilarimiz yuqori natijalarga erishib, yurtimizga qaytishadi”, deydi O‘zbekiston Karlar sport federatsiyasi vitse-prezidenti Husniddin Qutpiddinov.
Dilbar Karimovaning qo‘shimcha qilishicha, ushbu o‘yinlarda o‘zbekistonlik sportchilar shu kunga qadar bitta kumush va beshta bronza medalini qo‘lga kiritgan.
Ma’lumot uchun, Osiyo va Tinch okeani o‘yinlari birinchi marta 1984-yilda Osiyo va Tinch okeani futbol chempionati sifatida Tayvanning Taypey shahrida o‘tkazilgan va 1992-yilga qadar karlar futboli bo‘yicha Osiyo va Tinch okeani chempionati deya nomlangan.
Avvalroq prezidentning “Nogironligi bo‘lgan shaxslarni sportga jalb etish orqali jismoniy reabilitatsiya qilish tizimini takomillashtirish bo‘yicha qo‘shimcha chora-tadbirlar to‘g‘risida”gi qarori qabul qilingandi.
Izoh (0)