“Barselona” hujumchisi Robert Levandovski Chempionlar Ligasi umumiy bosqichining 5-turida “Brest” bilan o‘yinda penaltini aniq amalga oshirdi.
Polshalik forvard uchun bu gol turnirdagi 100-gol bo‘ldi. Ilgari bu ko‘rsatkichga faqat Krishtianu Ronaldu (140) va Lionel Messi (129) erishgan edi. Bu natijaga erishish uchun 36 yoshli Levandovskiga 125 ta o‘yin kerak bo‘ldi. U avvalroq Dortmundning “Borussiya” va “Bavariya” klublarida to‘p surgan. “Barselona” uchun futbolchi Chempionlar Ligasida 19 ta o‘yinda 14 ta gol urdi.
Hozirda Saudiya Arabistonining “Al-Ittihod” jamoasida to‘p surayotgan Karim Benzema hisobida Chempionlar Ligasida 90 ta gol bor. O‘z faoliyatini olib borayotgan futbolchilardan Tomas Myuller (54) va Kilian Mbappe (49) Chempionlar Ligasida 100 lik dovonga eng yaqin kelgan sportchilar hisoblanadi.
Ma’lumot uchun, ispan klubi ushbu uchrashuvda 3:0 hisobida g‘alaba qozondi.
Avvalroq “Barsa” hujumchisi Ronaldu va Messi bilan raqobat qilgani haqida gapirgan edi.
Izoh (0)