O‘zbekiston prezidentining tegishli farmoni bilan Shuhrat Xolmuhammedov mudofaa vaziri etib tayinlandi.
General-mayor Shuhrat Xolmuhammedov 2021-yildan buyon mudofaa vazirining birinchi o‘rinbosari – Qurolli Kuchlar Bosh shtabi boshlig‘i lavozimida ishlab kelayotgandi. Undan avval mudofaa vazirining o‘rinbosari, Prezident huzuridagi Xavfsizlik kengashi kotibining o‘rinbosari, favqulodda vaziyatlar vazirining o‘rinbosari kabi lavozimlarda faoliyat yuritgan. 2016-yilda “Sodiq xizmatlari uchun” medali bilan taqdirlangan.
Mudofaa vazirligiga 2019-yildan rahbarlik qilib kelgan Bahodir Qurbonov Davlat xavfsizlik xizmati raisi etib tayinlangandi. Unga general-polkovnik harbiy unvoni berildi.
DXXning avvalgi rahbari Abdusalom Azizov esa Prezident huzuridagi Xavfsizlik kengashi kotibiyati ixtiyoriga o‘tkazildi. Bu uning biror lavozimga tayinlangani yoki doimiy ishga rasmiylashtirilganini anglatmaydi.
Izoh (0)