Avtomobilda yo‘lovchi va yuklarni tashish huquqini beruvchi litsenziya narxi 340 mingdan 675 mingga oshgan.
“Daryo” nashri narxning qariyb ikki barobar qimmatlashishiga nima sabab bo‘lganini o‘rgandi. Yagona interaktiv davlat xizmatlari portali Call-markazi operatorlarining “Daryo”ga ma’lum qilishicha, Vazirlar Mahkamasining 2024-yil 31-iyuldagi qaroriga asosan 2019-yil 30-iyuldagi hukumat qaroriga qo‘shimcha va o‘zgartirish kiritilgan.
Unga ko‘ra, endilikda ariza beruvchi ushbu davlat xizmati bo‘yicha so‘rovnoma to‘ldirayotganda o‘zini o‘zi band qilgan shaxsni davlat soliq xizmati organlarida ro‘yxatdan o‘tkazish xizmatidan kompozit usulda foydalanishi mumkin. Sodda qilib tushuntiradigan bo‘lsak, noyabrdan boshlab yo‘lovchi va yuklarni tashish huquqini beruvchi litsenziya narxi bilan bir vaqtda o‘zini o‘zi band bo‘lgan shaxslar uchun ko‘zda tutilgan bir yillik soliq ham undirib olinmoqda.
Vazirlar Mahkamasining 2024-yil 31-iyuldagi qaror bilan 3-noyabrdan boshlab arizani ko‘rib chiqish uchun to‘lanadigan yig‘im miqdori Davlat xizmatlari markazi orqali topshirilganda bazaviy hisoblash miqdorining 2 baravari (750 ming so‘m), Yagona interaktiv xizmatlar portali orqali murojaat qilinganda esa esa 1,8 baravari etib belgilangan.
Avvalgi tartibda mazkur xizmat uchun yig‘im narxi BHMning 1 barobari (340 ming so‘m) miqdorida belgilangan edi. Oktyabrdan bazaviy hisoblash miqdori 340 ming so‘mdan 375 ming so‘mga oshirilgan. Shuning barobarida litsenziya berish haqidagi arizani ko‘rib chiqish uchun to‘lanadigan yig‘im miqdori ham teng miqdorida qimmatlashgani oqibatida hozirgi narx kelib chiqqan.
Prezident Shavkat Mirziyoyev tomonidan 2022-yil 7-iyulda imzolangan “Avtotransport vositalarini boshqarishda va yo‘nalishsiz taksi faoliyatini amalga oshirishda qo‘shimcha qulayliklar yaratish to‘g‘risida”gi qaror bilan 2022-yil 1-sentyabrdan 2024-yil oxiriga qadar fuqarolar o‘zini o‘zi band qilgan shaxs sifatida ro‘yxatdan o‘tib, yengil avtomobilda yo‘lovchi tashish faoliyatini amalga oshirishiga ruxsat berilgandi.
Buning uchun haydovchilar avvalo o‘zini o‘zi band bo‘lgan shaxs sifatida ro‘yxatdan o‘tadi. So‘ngra yo‘lovchi tashishga litsenziya varaqasi olish uchun ariza bilan murojaat qilinadi.
Ma’lumotlarga ko‘ra, 2024-yilning 1-mart holatiga o‘zini o‘zi band qilgan haydovchilar 420,8 ming nafarni tashkil etmoqda. 2024-yilning yanvar—may oylarida avtomobil transportida ko‘rsatilgan bozor xizmatlari umumiy hajmida taksi xizmatlarining ulushi 52,1 foizni yoki 11 trillion so‘mni tashkil etgan. Avtomobil transportida yo‘lovchi tashishning umumiy hajmida taksi xizmatlarining ulushi 80,5 foizni tashkil etadi.
Ma’lumot uchun, prezidentning 2022-yil 19-dekabrdagi qarori bilan elektromobillar va gibrid avtomobillarda yo‘lovchilarni tashish xizmatlarini ko‘rsatuvchi jismoniy va yuridik shaxslar 2030-yil 1-yanvarga qadar litsenziya varaqalari berilgani uchun davlat bojini to‘lashdan ozod etilgan.
Izoh (0)