“An-Nassr”ning portugaliyalik yulduz hujumchisi Krishtianu Ronaldu o‘zining YouTube’dagi navbatdagi internetni “buzib yuboradigan” mehmoni Mr Beast ekanini ma’lum qildi.
Bir necha kun oldin futbolchi navbatdagi mehmoni kim bo‘lishini sirli tarzda e’lon qilgan edi. Bu esa ijtimoiy tarmoq foydalanuvchilari orasida muhokamalarga sabab bo‘ldi va ko‘pchilik bu “Barselona” afsonasi Messi bo‘lishi mumkinligini taxmin qildi.
Mr Beast (asl ismi Jeyms Stiven Donaldson) dunyodagi eng mashhur YouTube blogerlaridan biri bo‘lib, uning auditoriyasi 330 milliondan ortiq. Ronalduning kanalini esa 67 milliondan ko‘proq obunachi kuzatadi.
Mr Beast ishtirokidagi epizod premyerasi bugun, 21-noyabr kuni Krishtianuning YouTube kanalida bo‘lib o‘tishi rejalashtirilgan.
Ma’lumot uchun, Rio Ferdinand va Krishtianuning sevgilisi Jorjina Rodriges Ronalduning YouTube kanalidagi bir nechta epizodlarda ishtirok etgan.
Ronalduning YouTube kanali obunachilar to‘plash tezligi bo‘yicha Ginnes rekordini o‘rnatgan.
Izoh (0)