“Qilgan ishimdan afsuslanmayman” — aktrisa Feruza Meliboyeva rol uchun sochidan voz kechganiga izoh berdi

O‘zbekiston davlat drama teatri aktrisasi Feruza Meliboyeva “Mening yurtim” telekanalining “Omon-omon” ko‘rsatuviga intervyu berdi. Intervyu davomida aktrisa rol uchun sochlaridan voz kechgani, bu voqea aslida qanday boshlangani va taklif kimdan chiqqani haqida gapirdi.

Aktrisa “Mehmonjonlardan aylanay” seriali uchun 20 kg vazn tashlagani, qoshidan voz kechgani haqida eslab o‘tdi. “Qizim” serialidagi epizodda esa uzun sochlarini tagi bilan oldirib tashlab, kadr ortidagi jarayonda rejissyorga “Nega unday qildiryapsiz, axir, gonorar ham shunga yarasha katta emas-ku” degan norozi qiyofadagi videolari ijtimoiy tarmoqlarni “portlatdi”. Aktrisa bu holatga shunday izoh berdi:

— Aslida bir yomon stilistning qo‘liga tushib qoldim, sochimni kuydirib qo‘ydi. Eng maqbul yechimni sochimni butunlay kalga oldirib tashlab, boshqattan o‘stirishda ko‘rdim. Bu haqida turmush o‘rtog‘imga aytganimda qarorim qat’iy ekanligini so‘rab, baribir sochingni oldirar ekansan, kel shuni serialdagi epizodda qil, ijoding uchun ham yaxshi rol bo‘ladi, degan taklifni berdi. O‘zimga ham ma’qul bo‘ldi. Kadrdagi norozi kayfiyatim va gaplarim piar uchun edi, serialga qiziqtirish maqsadida bu videoni kelishgan holda oldik, dedi u.

Boshlovchilarning iltimosiga ko‘ra aktirsa

efirda yasama sochini boshidan olib ko‘rsatdi va buni serialda millionlab odamlar ko‘rganini, uyalmasligini aytdi.

“Shu videolar tarqalgandan so‘ng nega bu ishni qildingiz, deb qo‘ng‘iroq qilganlar ko‘paydi, bu ayol ruhan sog‘lom emas, ham deyishdi. Qilgan ishimdan hech qachon afsuslanmayman”, deydi Feruza Meliboyeva.