“Daryo”da “MIBdan 7 milliardga yaqin qarzdorligi bor Andijon tumani hokimi Captiva-5 sotib oldi va bu qarorni yashirib qo‘ydi” sarlavhali maqola e’lon qilingandi. Unda Andijon tumani hokimligi “qora-mat” rangli Captiva 5T Premier avtomobilini xarid qilgani, bunga tuman hokimining 13-iyundagi qarori asos qilib olingani, ushbu qaror “E-qaror” platformasida yashirib qo‘yilgani, shuningdek, XDFU (xizmat doirasida foydalanish uchun) yozuvining mavjudligi qayd etilgandi.
_page-0001.jpg)
Andijon viloyati adliya boshqarmasi ushbu holat yuzasidan munosabat bildirdi.
Aniqlanishicha, tuman hokimligi tomonidan moliya organi bilan dastlab kelishilmagan taklif loyihasi bo‘yicha qaror qabul qilinishiga yo‘l qo‘yilgan.
“Mazkur qaror yuzasidan quyidagilar aniqlangan:
- qarorga asossiz ravishda “XDFU” grifi belgilangan;
- qaror qonunchilik hujjatlariga zid ravishda “yopiq” tartibda qabul qilingan.
Biroq O‘zbekiston Respublikasi Byudjet kodeksi hamda “Davlat hokimiyati va boshqaruvi organlari faoliyatining ochiqligi to‘g‘risida”gi qonunga ko‘ra, byudjet mablag‘larini ajratish to‘g‘risidagi ma’lumotlar ochiq axborot sifatida belgilangan.
Shunga ko‘ra, mazkur qaror yuzasidan tuman hokimligiga Andijon tuman adliya bo‘limi tomonidan 2024-yil 15-noyabr kuni qonun hujjatlarining buzilishi, ularning sabablari va bunga olib keluvchi shart-sharoitlarni bartaraf etish to‘g‘risida 1-60/12-7/94-son taqdimnoma kiritildi”, deyiladi munosabatda.
Adliya vazirligi axborot xizmati mas’ullarining ma’lum qilishicha, taqdimnomaga asosan Andijon tuman hokimining qarorini bekor qilish belgilangan.
Izoh (0)