Olma sirkasi pazandachilikda, xalq tabobatida va ba’zan kosmetologiyada ishlatiladi. Ba’zilar undan ozish uchun foydalanadi, ammo diyetolog mutaxassis ushbu sirkani ichish mutlaqo mumkin emasligini ma’lum qildi.
Olma sirkasi ushbu meva sharbatining fermentatsiyasi jarayonida ishlab chiqariladi. Uning 95 foizini suv, 5-6 foizini sirka kislotasi tashkil etadi. Sirka olmani maydalash, sharbatini chiqarib, keyin bakteriyalar va xamirturush qo‘shish orqali tayyorlanadi.
Olma sirkasi bilan bog‘liq yanglish fikrlar
Hozirda tarmoqlarda ushbu mahsulotni oshqozon-ichak trakti, xolesterin oshishi va 2-toifa qand kasalligi kabi muammolarni davolashda va profilaktik chora sifatida qo‘llash bo‘yicha ko‘plab tavsiyalar mavjud.
Diyetolog va gastroenterolog Yana Muzirining so‘zlariga ko‘ra, ba’zi tadqiqotlar olma sirkasi salomatlikni yaxshilashga yordam berishini tasdiqlaydi. Olma sirkasini turli oziq-ovqat bilan birga iste’mol qilish glyukoza darajasini biroz pasaytirishi mumkin. Ammo bu usul diabetning oldini olish yoki nazorat qilish uchun yetarli emas.
Ba’zilar olma sirkasini jig‘ildon qaynashi va oshqozondagi kislota darajasining oshishi — gipoxlorgidriyani davolashda qo‘llaydi. Bu vosita umumiy ahvolni biroz yaxshilasa-da, uning samaradorligi haqida hech qanday ilmiy dalil yo‘q. Shu sababli mazkur davolash usulini uy sharoitida qo‘llash mumkin emas.
Ilgari sirka kislotasi ortiqcha yog‘lardan xalos bo‘lish va ishtahani oshiruvchi gormonlarni kamaytirishga yordam beradi, deb hisoblangan. Bu fikr xato bo‘lib, uni isbotlaydigan va birorta tadqiqot mavjud emas.
Olma sirkasining zararlari
Tish emalini yemiradi
Olma sirkasi tarkibidagi kuchli kislotalar tish emaliga jiddiy zarar yetkazadi, sirkani suvga qo‘shmasdan o‘z holicha ichish esa og‘iz bo‘shlig‘i va qizilo‘ngachning kuyishiga olib keladi. Umumiy nojo‘ya ta’sirlarga ko‘ngil aynishi, qorin og‘rishi, jig‘ildon qaynashi kiradi.
Gipokalemiya
Agar organizmda avvaldan kaliy yetishmasligi bo‘lsa, olma sirkasi vaziyatni yanada yomonlashtiradi. Diuretiklar va insulin kabi dorilar bilan olma sirkasi o‘zaro ta’sirlashib, sog‘liqqa zarar yetkazishi mumkin.
Shuningdek, buyragida muammosi bor shaxslar olma sirkasini ichmasliklari kerak. Bunday bemorlar uchun ortiqcha miqdoridagi kislotalar o‘ta xavfli hisoblanadi.
Olma sirkasini turli marinadlar va souslarni tayyorlash uchun asos sifatida qo‘llash mumkin. Mahsulot iste’molidan so‘ng umumiy ahvol yomonlashsa, shifokorga murojaat qilish zarur.
Izoh (0)