Ijtimoiy tarmoqlarda iyun oyida “Tottenhem” klubining urugvaylik yarim himoyachisi ishtirokidagi video tarqaldi.
Unda teleboshlovchi Bentankurdan jamoadoshining futbolkasini so‘radi. “Sonni? Bu Sonnining amakivachchasining futbolkasi ham bo‘lishi mumkin. Ularning barchasi bir xil ko‘rinishga ega”, deb javob berdi Rodrigo.
Keyinchalik Bentankur ijtimoiy tarmoqlarda Sondan uzr so‘radi.
“Men Rodrigoni yaxshi ko‘raman. Bizda juda ko‘p yaxshi xotiralar bor, biz u transfer qilinganidan beri (2022-yilning yanvarida) birga o‘ynayapmiz. U hammasini tushundi va ta’tilga chiqqanimizda darhol kechirim so‘radi. Men uyda edim va nima bo‘layotganini ham tushunmadim. U menga uzoq xabar yubordi va bu yurakdan chiqqani aniq edi”, dedi Son.
Angliya futbol assotsiatsiyasi (FA) Bentankurni “noto‘g‘ri xatti-harakatlar” va “etnik yoki irqiy haqoratomuz so‘zlarni ishlatganlik”da aybladi.
Daily Mail xabariga ko‘ra, urugvaylik futbolchi uzoq muddatga diskvalifikatsiya qilinishi mumkin. Bir nechta manbalarga ko‘ra, futbolchi 7 o‘yinga chetlatiladi, ammo bu raqam hali tasdiqlanmadi.
Izoh (0)