Qirg‘iziston huquq-tartibot organlari tomonidan mahalliy kengashlar saylovida ommaviy tartibsizliklar uyushtirib, hokimiyatni ag‘darmoqchi bo‘lgan gumonlanuvchilar guruhi qo‘lga olingani haqida xabar berilgandi.
Qamoqqa olinganlar orasida sobiq bosh prokuror o‘rinbosari, adliya general-mayori Quban Adil o‘g‘li ham bor. U guruh moliyaviy ta’minot, huquqni muhofaza qiluvchi organlar bilan aloqa o‘rnatish, ularning harakatlari to‘g‘risida qo‘lga kiritilgan ma’lumotlarni yetkazish, ommaviy tartibsizliklar va hokimiyatni egallashda vazifalarni taqsimlash hamda muvofiqlashtirishda ayblanmoqda.
Bishkek shahrining Birinchi May tuman sudi 12-noyabr kuni Quban Adil o‘g‘lini Qirg‘iziston Respublikasi IIV Tergov xizmati tergovchisining iltimosnomasiga ko‘ra hibsga olinganini va 2025-yil 10-yanvargacha qamoqda saqlanishini tasdiqlagan.
Dastlabki ma’lumotlarga ko‘ra, sobiq bosh prokuror o‘rinbosari Qirg‘iziston Jinoyat kodeksining “Ommaviy tartibsizliklar”, “Uyushgan guruh tuzish yoki unda ishtirok etish”, “Uyushgan guruhlar va jinoiy uyushmalarni moliyalashtirish” hamda “Hokimiyatni zo‘rlik bilan egallash” moddalari bo‘yicha ayblanmoqda.
Ma’lumotlarga ko‘ra, Quban Adil o‘g‘li joriy yilning bahorida prezident Sadir Japarovning farmoyishi bilan Tabiat resurslari vazirligi huzuridagi komissiya ishiga aralashgani ortidan lavozimidan ozod etilgan.
Izoh (0)