O‘zbekistonda ayrim tadbirkorlarga to‘langan solig‘ining bir qismi qaytarib berilishi haqida xabar berilgan edi. Hukumat qarori bilan umumiy ovqatlanish, turoperatorlik va mehmonxona xizmatlarini ko‘rsatuvchi tadbirkorlik subyektlariga byudjetga to‘langan qo‘shilgan qiymat solig‘ining bir qismini qaytarish tartibi to‘g‘risidagi vaqtinchalik nizom tasdiqlandi.
Vaqtinchalik nizomga ko‘ra, 2024-yil 1-oktyabrdan boshlab turoperatorlik va mehmonxona xizmatlarini ko‘rsatuvchi tadbirkorlik subyektlariga — byudjetga to‘langan soliqning 20 foizi qaytariladi.
2025-yil 1-yanvardan boshlab umumiy ovqatlanish xizmatlarini ko‘rsatuvchi tadbirkorlik subyektlariga oylik tovarlarni (xizmatlarni) realizatsiya qilish bo‘yicha aylanmasining naqd pulsiz qismi:
- 60 foiz va undan yuqori bo‘lganda — byudjetga to‘langan soliqning 40 foizi;
- 60 foizdan kam bo‘lganda — byudjetga to‘langan soliqning 20 foizi qaytariladi.
Tadbirkorlik subyekti soliq hisobotini taqdim etgandan so‘ng, lekin 3 oydan kechiktirmasdan soliqning bir qismini qaytarish uchun murojaat qilishga haqli.
Soliqning bir qismi quyidagi shartlar to‘liq bajarilganda avtomatik ravishda qaytariladi:
- hisobot davrida soliq bo‘yicha taqdim etilgan soliq hisobotiga muvofiq hisoblangan soliq byudjetga to‘liq to‘langanda;
- hisobot davrida umumiy ovqatlanish, turoperatorlik yoki mehmonxona xizmatlarini ko‘rsatish bo‘yicha umumiy tovar aylanmasi jami tovar aylanmasining 90 foizidan kam bo‘lmaganda;
- hisobvaraq-fakturalarda yoki nazorat-kassa texnikasi cheklarida realizatsiya qilingan tovarlar (xizmatlar) nomenklaturasi hamda faoliyatining o‘ziga xos xususiyatlariga yoki amalga oshiriladigan turlariga muvofiq bo‘lgan identifikatsiya kodlari aks ettirilgan qismiga nisbatan.
Mazkur vaqtinchalik nizom qoidalari aniqlashtirilgan soliq hisoboti taqdim etilishi natijasida xosil bo‘lgan ortiqcha to‘lov summasiga nisbatan tadbiq etilmaydi. Vaqtinchalik nizom 2028-yil 1-yanvargacha amal qiladi.
Tadbirkorlik subyektlari tomonidan to‘langan soliqning bir qismi asossiz qaytarib olingani (yolg‘on ma’lumotlar taqdim qilish, hujjatlarni soxtalashtirish) aniqlanganda, asossiz qaytarib olingan summa belgilangan tartibda penya hisoblangan holda byudjetga undiriladi.
Izoh (0)