Toshkent metrosining yana 9 ta metro bekatida ona va bola xonasi hamda hojatxona tashkil qilinadi. Bu haqda metropoliten matbuot xizmati xabar berdi.
2022-yilning fevralida Toshkent metropolitenining “Chilonzor” bekatida ona va bola xonasi hamda hojatxona foydalanishga topshirilgandi. O‘shanda hojatxona sinov tariqasida qurilgan, kelgusida gavjum, yo‘lovchilar oqimi ko‘p bo‘lgan “Paxtakor”, “Buyuk ipak yo‘li” va boshqa bekatlarda qurilishi rejalashtirilgani bildirilgandi.
Metropoliten matbuot xizmati xabarida ta’kidlanishicha, “Chilonzor” bekatidagi ona va bola xonasi hamda hojatxona sinov jarayonlari o‘zini oqladi. Boshqa bekatlarga nisbatan yo‘lovchilar bilan gavjum bo‘lgan yana 9 ta metro bekatida ona va bola xonasi hamda hojatxona qurilishi uchun zarur ishlar amalga oshirilishi boshlanmoqda.
Xabarda hojatxonalar aynan qaysi bekatlardava qachon qurilishiga aniqlik kiritilmagan.
Bundan bir necha kun avval noma’lum erkak metropoliten bekatida hojatini chiqarib ketgani aks etgan video ijtimoiy tarmoqlarda tarqalib, keng muhokamalarga sabab bo‘lgandi. “Toshkent metropoliteni” bunga munosabat bildirib, holat 2024-yilning 27-sentyabrida sodir etilganini, fuqaroning shaxsiga aniqlik kiritilganini, unga nisbatan tergovga qadar surishtiruv ishlari amalga oshirilayotganini ma’lum qilgandi.
Izoh (0)