Qashqadaryo viloyatining Shahrisabz shahridagi klinikada 28 yoshli ayolni bo‘yniga “proba”siz qilingan antibiotik ukol sababli vafot etgan haqida xabarlar tarqaldi. Bosh prokuratura matbuot xizmati rahbari Hayot Shamsutdinov “Daryo”ga holat yuzasidan ma’lumot berdi.
6-noyabr kuni soat 11:00 larda 28 yoshli ayol N.B. xususiy poliklinikaga anginasi ishib ketgani bo‘yicha murojaat qilib kelgan. Uning tomog‘i ishib, yiringlagani sababli xususiy poliklinika LOR shifokori J.I. uning tomoq qismidan “Seftriakson” va “Deksametazon” dori vositalari aralashmasidan inyeksiya yuborganida bemor ayolning tili tortilib ketgan.
Ko‘rsatilgan tibbiy yordamga qaramasdan ayol sog‘lig‘i yomonlashib, hodisa joyida vafot etgan.
Ayni paytda holat yuzasidan tergovga qadar tekshiruv harakatlari olib borilmoqda.
Sentyabr oyida Toshkentda “Seftriakson” olgan ayol nafasi bo‘g‘ilib, hushini yo‘qotgani, u tezkorlik bilan shifoxonaga olib borilib, hayoti saqlab qolingani haqida xabarlar tarqalgandi. Farmatsevtika mahsulotlari xavfsizligi markazi bunga munosabat bildirib, holat dori vositasini shifokor tavsiyasisiz, o‘zboshimchalik bilan qabul qilingani sabab yuzaga kelganini ma’lum qilgandi.
Markaz bergan ma’lumotga ko‘ra, “Seftriakson” dori preparati keng ta’sir doirasiga ega bo‘lgan antibiotiklar oilasining uchinchi avlodiga mansub bo‘lib, u bakterial infeksiyalarni davolashda qo‘llanadi. Lekin shamollash, gripp va boshqa virusli infeksiyalar muolajasida ta’sir ko‘rsatmaydi.
Izoh (0)