Isroil armiyasining G‘azo janubidagi bo‘linmalari HAMASning ikkita tunnelini topib, ularni portlatib yubordi.
Ma’lum qilinishicha, 7-oktyabr kuni yahudiy davlatiga hujum qilishga aloqador bo‘lgan jangchilar ham zararsizlantirilgan.
Operatsiya davomida umumiy uzunligi ikki kilometrdan ortiq bo‘lgan ikkita yerosti tunneli aniqlandi va yo‘q qilindi. Harbiy xizmatchilar tunneldan chiqayotgan bir nechta HAMAS jangchilariga duch keldi. Ular zararsizlantirildi. Ularning ikki nafari 7-oktyabrdagi hujumda qatnashgan.
Isroil 2023-yil 7-oktyabr kuni G‘azo sektoridan raketa hujumiga uchradi. Shundan so‘ng HAMAS jangchilari chegarabo‘yi hududlariga kirib, harbiylar va fuqarolarga qarata o‘t ochdi hamda 200 dan ortiq kishini garovga oldi. Isroil tomoniga ko‘ra, o‘sha paytda 1200 ga yaqin kishi halok bo‘lgan.
Bunga javoban Isroil armiyasi G‘azo sektoriga keng hujumlarni boshladi. Sektor to‘liq blokada qilinib, suv, elektr energiyasi, yoqilg‘i, oziq-ovqat va dori-darmon yetkazib berish to‘xtatildi. Urush boshlanganidan beri G‘azoda 43 mingdan ortiq falastinlik halok bo‘ldi, yuz mingdan ortiq kishi jarohatlandi. Qurbonlarning aksariyati ayollar va bolalardir.
Izoh (0)