Farg‘ona viloyat qo‘g‘irchoq teatri jamoasi Eronda o‘tkazilgan xalqaro festival g‘olibi bo‘ldi. Bu haqda Farg‘ona viloyati hokimligi xabar qildi.
Joriy yilning 1-7-noyabr kunlari Eron Islom Respublikasining Xomadan shahrida 29-Xalqaro bolalar va o‘smirlar teatr festivali o‘tkazilgan. Unda Eron, O‘zbekiston, Armaniston, Iroq, Braziliya, Turkiya va Rossiyadan yigirmaga yaqin xalqaro jamoalar ishtirok etgan.
Mazkur festivalda Farg‘ona viloyat qo‘g‘irchoq teatri milliy teatrlar yo‘nalishi bo‘yicha ishtirok etib, Sergey Seduxin asari asosida sahnalashtirilgan “Musiqali choyxona” spektaklini namoyish etgan.
Festival yakuniy natijalariga ko‘ra “Eng yaxshi xorijiy spektakl” nominatsiyasi g‘olibiga aylangan.
"Mahalliy aholi tomonidan o‘ziga xos ishtiyoq bilan kutib olindik. Festival biz uchun g‘aroyib va qimmatli bir tajriba bo‘ldi hamda tomoshabinlar tomonidan ko‘rsatilgan iliq munosabatlar doimiy ravishda bizga hamrohlik qildi. Sahna ishlarini tomoshabinlar his-tuyg‘ulari bilan uyg‘unlashtirish, ular bilan tanishish va spektakl davomida olingan his-tuyg‘ularni ifodalash men va mening guruhim uchun takrorlanmas tajriba bo‘ldi", deydi spektakl prodyuseri va teatr rahbari Tavakkal Sultonov.
Izoh (0)