Andijon tumani hokimligi “qora-mat” rangli Captiva 5T Premler avtomobilini xarid qildi. Bu davlat xaridlari portali ma’lumotlarida keltirilgan.
Shartnoma 19-iyun kuni tuzilgan bo‘lib, avtomobilning narxi 335 mln so‘mni tashkil etadi.
_page-0001.jpg)
Avtomobilni sotib olishga tuman hokimining 13-iyundagi qarori asos qilib olingan.
Qarorda mablag‘ tuman byudjetining zaxira jamg‘armasi mablag‘lari hisobiga sotib olinishi belgilangan. Biroq nima maqsadda sotib olinish zarurligi haqida ma’lumot keltirilmagan.
“Daryo” muxbiri o‘rganish davomida ushbu qaror Adliya vazirligining “E-qaror” yagona elektron tizimi platformasida yashirib qo‘yilgani, shuningdek, XDFU (xizmat doirasida foydalanish uchun) yozuvining mavjudligini aniqladi.
_page-0001.jpg)
Shuningdek, ushbu hujjat mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi ko‘rsatib o‘tilgan bo‘lsa-da, qaror matni “Shaxsga doir ma’lumotlar to‘g‘risida”gi qonunga mos kelmasligini ko‘rish mumkin.
Qiziq jihati, yangi avtomobil xarid qilishga mablag‘ ajratgan hokimlikning 68 ta ijro hujjatlari bo‘yicha jami 6 milliard 680 million 575 ming so‘m qarzdorligi mavjudligi va ayrimlari bir necha yillardan buyon to‘lanmay kelayotgani, mulklari taqiqqa aniqlangan.
Hokimlik nega yangi avtomobil xaridiga oid qarorni yashirib qo‘ydi?
Mablag‘ ajratishga oid qarorni yashirib qo‘yish qonunchilikka zid emasmi?
Qaror qabul qilinganiga to‘rt oydan ortiq vaqt o‘tgan bo‘lsa-da, adliya organlari nega ushbu qarorni e’tiborsiz qoldirmoqda?
“Daryo” shu va mavzuga oid boshqa savollarga mas’ullardan munosabat kutib qoladi.
Izoh (0)