Sirdaryoda 6,7 kilodan ortiq zargarlik buyumlarini chegaradan yashirincha olib o‘tmoqchi bo‘lgan ayol va uning nevarasi qo‘lga tushdi. Bu haqda Bojxona qo‘mitasi matbuot xizmati xabar berdi.
“Malik” chegara o‘tkazish punkti orqali harakatlanayotgan fuqarolardan biri xolislar ishtirokida shaxsiy ko‘rikdan o‘tkazilganida, ichki kiyimlari orasidan oyoqlarining yuqori qismiga 19 dona o‘ram yashirgani aniqlangan.
Mazkur o‘ramlar belgilangan tartibda ochib ko‘rilganida ularning ichida 9 turdagi 468 dona qimmatbaho metalldan yasalgan va brilliant toshlar bilan bezatilgan zargarlik buyumlari bo‘lgan.
Ushbu shaxs zargarlik buyumlarini yashirincha olib o‘tishda yonidagi 14 yoshli nevarasidan ham foydalangan. Voyaga yetmagan qiz belgilangan tartibda ko‘zdan kechirilganda, uning ham ichki kiyimlari orasiga 12 dona o‘ram yashirilgani aniqlangan Mazkur o‘ramlarda esa 8 turdagi 454 dona taqinchoq bo‘lgan.
Shunday qilib, bojxona nazoratidan yashirilgan jami 922 dona tilladan yasalgan brilliant toshlar o‘rnatilgan zargarlik buyumlarining umumiy og‘irligi 6,7 kilodan oshmoqda, umumiy qiymati esa 5,6 milliard so‘mni tashkil qilmoqda.
Qonunchilikka ko‘ra, O‘zbekistonda jismoniy shaxslar tomonidan 65 grammgacha og‘irlikdagi qimmatbaho metall va qimmatbaho toshlardan yasalgan zargarlik buyumlarini bojsiz olib kirishga ruxsat etiladi.
Izoh (0)