Zamonaviy musiqa olamining eng mashhur va ziddiyatlarga boy namoyondalaridan biri sifatida tan olingan Kanye Uest o‘zi haqida “In Who’s name?” nomli hujjatli filmni suratga oldi. Bu haqda “Pravila jizni” nashri xabar bermoqda. Mazkur film 2025-yilda namoyish etilishi rejalashtirilgan.
Manbalarga ko‘ra, umumiy byudjeti 1 milliard dollarga tushgan loyiha reperning hayoti davomida avval nashr etilmagan arxiv kadrlardan iborat. Biografik film ustida Kanye Uest bilan birga 18 yoshli rejissyor Nikolas Ballesteros ishlagan. Unda reperning hayoti butunlay o‘zgarib ketishiga nimalar sabab bo‘lgani ham yoritiladi (Uest 2021-yilda o‘z ismini rasman Ye ismiga deb o‘zgartirgan). Film haqidagi promo-rolik 7-noyabr kuni e’lon qilinadi.
Variety nashrining qayd etishicha, filmda qanday qilib Kanye Amerika tarixidagi eng badavlat qora tanli odamga aylangani haqida hikoya qilinadi. Shu bilan birga, super yulduz nega ozodlik yo‘lida erishgan barcha narsasini xavf ostiga qo‘ygani, korporativ ekspluatatsiya, irqiy ajratishlar va Amerika orzusiga xos bo‘lgan psixologik muammolarga duch kelgani yoritiladi. Filmda Kim Kardashyan, Julia Foks va Yening farzandlari ham ishtirok etishi kutilmoqda.
Filmni xalqaro distributsiya qilish huquqi Utopia va Goodfellas kompaniyalariga berilgan. Utopia kompaniyasining vitse prezidenti Mari Zeniter mazkur loyiha keng jamoatchilik o‘rtasida katta qiziqish uyg‘otishiga ishonch bildirdi. Uning so‘zlariga ko‘ra, film tomoshabinga ma’lum bir fikrni targ‘ib etmaydi, balki xulosa qilishni ularning o‘zlariga qo‘yib beradi.
“In Who’s name?” biografik filmi Kanye Uest haqidagi birinchi hujjatli film emas. 2022-yilda Netflix platformasida “Jeen-yuhs: Kanye trilogiyasi” nomli uch qismli film chiqqan. Loyiha operatori va rejissyori reperning uzoq yillik do‘sti Kudi bo‘lgan.
Izoh (0)