Qozog‘iston “raqamli ko‘chmanchilar” — masofaviy ish va sayohatni birlashtirgan sayyohlar uchun yangi Neo Nomad vizasini berishni boshladi. Bu haqda respublika Turizm vazirligi matbuot xizmati xabar berdi.
Bunday vizani olish uchun xorijlik Qozog‘istondan tashqarida kamida 3 ming dollar daromadga ega bo‘lishi kerak.
Vazirlik bayonotida aytilishicha, yangi viza rejimini joriy qilishda COVID-19 pandemiyasidan keyin bunday dasturlarni yo‘lga qo‘ygan 50 ta davlat tajribasidan foydalanilgan. Neo Nomad vizasi bilan chet el fuqarolari xorijiy kompaniyalardagi faoliyatini davom ettirgan holda Qozog‘istonda bir yilgacha bo‘lishlari mumkin.
Neo Nomad talablari tibbiy sug‘urta va sudlanmaganlik to‘g‘risidagi ma’lumotnomani o‘z ichiga oladi. Qayd etilishicha, bunday vizaning joriy etilishi tufayli Turizm vazirligi har yili 3 milliard tenge (6,8 million dollar) foyda oladi.
Qozog‘istonda 2023-yil oktyabr oyidan boshlab “raqamli ko‘chmanchi” vizasini joriy etish rejalashtirilgan edi. Bunday dastur kelajakda fuqarolikni olish uchun hech qanday asos bo‘lmasligi ma’lum qilingan. Agar chet el fuqarosi yashash uchun ruxsatnoma olmoqchi bo‘lsa, u buni umumiy asosda amalga oshiradi.
Izoh (0)