Yandex Uzbekistan kompaniyasi noyabr oyi davomida “Saxovatli noyabr” xayriya aksiyasini o‘tkazadi. Har bir foydalanuvchi juma kunlari Yandex Go xizmatlari orqali buyurtmalar berib, ushbu tashabbusning bir qismiga aylanishi mumkin bo‘ladi.
Kompaniya barcha taksi va yetkazib berish tariflarida har 10 km uchun xayriya tashkilotlariga 50 so‘m o‘tkazadi. Shuningdek, Yandex Go “Yemak” xizmatida juma kuni 60 000 so‘mdan oshiq buyurtmalar uchun fondlarga 500 so‘mdan ajratiladi.
Yig‘ilgan mablag‘lar “Ona Uyi”, “Teach for Uzbekistan”, “ONA”, “SHAROIT PLYUS” kabi xayriya tashkilotlariga teng miqdorda taqsimlanadi.
“Teach for Uzbekistan” tashkiloti direktori Umida Yo‘ldosheva shunday dedi: “Sifatli ta’lim bolalar uchun yaxshi kelajak sari muhim qadamdir. “Saxovatli noyabr" aksiyasida ishtirok etish ko‘proq odamlarni bizning maqsadlarimizga jalb qilishga yordam beradi. Yandex Uzbekistan kompaniyasiga taqdim etilgan imkoniyat uchun, ushbu loyihada qatnashayotgan insonlarga esa qo‘llab-quvvatlaganlari uchun minnatdorchilik bildiraman”.
“Ona Uyi” Xalqaro fondining O‘zbekistondagi filiali rahbari Gulnoza G‘afurova esa shunday dedi: “Biz har bir onaning qo‘llab-quvvatlashga munosib ekanligiga va har bir bolaning oilada ulg‘ayish imkoniyatiga ega bo‘lishiga ishonamiz. Ushbu aksiyada ishtirok etayotgan tashkilotlar qatoridan joy olganimizdan xursandmiz. Yandex Uzbekistan va uning foydalanuvchilari bilan birgalikda kamroq bolalar Mehribonlik uylariga tushishiga erishishimiz mumkin”.
Yandex Uzbekistan tomonidan tashkil etilgan “Saxovatli noyabr” aksiyasi mamlakatda uchinchi marta o‘tkazilmoqda. Bu kompaniyaning nodavlat tashkilotlarni qo‘llab-quvvatlash loyihalaridan biridir. Kompaniyaning bir nechta hamkor tashkilotlari xodimlari va ularning homiylari Yandex Go doirasida doimiy amal qiluvchi xayriya dasturi asosida bepul taksi va yetkazib berish xizmatlaridan foydalanib kelmoqda.
2023-yil “Saxovatli noyabr” aksiyasi doirasida to‘plangan xayriya mablag‘lari “SHAROIT PLYUS” tashkilotiga nogironligi bo‘lgan insonlar uchun kompyuter xonasi va tikuv sexi binosini kapital ta’mirlash xarajatlarini qisman qoplash imkonini berdi. “Kapalak Bolalar” tashkiloti esa tibbiy savodxonlik bo‘yicha seminarlar o‘tkazdi.
“ONA” fondi esa yig‘ilgan mablag‘ni talabalar uchun stipendiya to‘lovlari va ta’lim muassasalarini qo‘llab-quvvatlashga yo‘naltirdi. 2023-yil “Saxovatli noyabr” aksiyasi natijasida Yandex Uzbekistan kompaniyasi xayriya tashkilotlariga jami 101 million so‘m mablag‘ o‘tkazgan.
2024-yilda tadbirda ishtirok etgan xayriya tashkilotlari haqida:
- O‘zbekistondagi "Ona Uyi" Xalqaro fondining filiali ijtimoiy yetimlikning oldini olish maqsadida faoliyat yuritadi va yangi tug‘ilgan chaqaloqlar hamda yosh bolali onalarni qo‘llab-quvvatlaydi. Filialning resurs markazlari qiyin holatga tushib qolgan oilalarga farzandini tashlab ketmaslikka yordam beradi. O‘zbekistonda 2 shaharda 3 ta markaz faoliyat yuritib, oilalarga kompleks yordam ko‘rsatadi.
- Teach for Uzbekistan – O‘zbekistonda maktab ta’limi rivoji va qo‘llab-quvvatlanishiga yordam berishni asosiy maqsad qilgan yangi formatdagi notijorat tashkilot. U chet el va mahalliy nufuzli universitetlarning iste’dodli bitiruvchilarini mutaxassislar yetishmayotgan hududiy maktablarda STEM fanlari o‘qitishga tizimli jalb qiladi. Bu tashabbus har bir bolaning salohiyatini ochib berishga yordam berish orqali mamlakat rivojiga hissa qo‘shadigan yetakchilar jamiyatini yaratishga intiladi.
- “ONA” jamoat fondi qiyin vaziyatga tushib qolgan ayollar va bolalarga yordam ko‘rsatadi. Fond tibbiy yordam, huquqiy ko‘mak beradi va ijtimoiy moslashuvga yordamlashadi. Loyihalar orasida jarrohlik operatsiyalari uchun to‘lov, ko‘p bolali onalarga yordam va yosh ayollar uchun ta’lim grantlari bor. Shuningdek, “ONA” shifoxonalar sharoitlarni yaxshilaydi va uzoq hududlarda toza suv bilan ta’minlash dasturlarini amalga oshirib, butun mamlakat bo‘ylab minglab insonlarga yordam beradi.
- SHAROIT PLYUS: Toshkentdagi nogironligi bo‘lgan insonlar jamoat birlashmasi. Sharoit Plus nogironligi bor insonlar va ularning oilalariga ijtimoiy va huquqiy yordam ko‘rsatadi. Tashkilot nogironligi bor kishilarni zamonaviy kasblarga o‘rgatadi, ularning ishga joylashishiga ko‘maklashadi va inklyuziya sohasida loyihalarni amalga oshiradi. Tashkilotning missiyasi — nogironligi bor insonlar va ularning oilalari jamiyat hayotida to‘laqonli ishtirok etish uchun teng huquq va imkoniyatlarga ega bo‘ladigan to‘siqsiz va inklyuziv jamiyat yaratishdir.
Izoh (0)