Ba’zi olimlarning ta’kidlashicha, dunyoda har bir odamning kamida bir nechta qiyofadoshlari bor. Albatta, mashhurlar ham bundan mustasno emas va ular muntazam ravishda televizorda ko‘rinib turishgani sababli ularning juftligini topish ancha oson.
Yaqinda Nyu York bog‘larining birida aktyor Timoti Shalamega o‘xshash qiyofalar musobaqasi bo‘lib o‘tdi. Tanlovda 2600 dan ortiq ishtirokchi yig‘ildi. Ularni tanlov g‘olibiga 50 dollarlik mukofot va’da qilgan YouTube blogeri Entoni Po birlashtirdi.
Muxlislar sevimli aktyoriga o‘xshash yoki yo‘qligini sinash uchun Vashington-skver parkiga yig‘ilishdi. Tanlovda hatto uy hayvonlari ham ishtirok etdi.
Musobaqada Mayls Mitchell ismli yigit g‘olib bo‘ldi, u Villi Vonka obrazida namoyon bo‘ldi va ryukzakidan atrofdagilarga shirinliklar sochib yurdi.
“Men bir vaqtning o‘zida ham xursand va hayratdaman. Bu yerda menga o‘xshagan insonlar juda ko‘p ekan. Bu haqiqatan ham ajoyib tajriba bo‘ldi” deydi chempion.
Agar haqiqiy Timoti Shalame tashrif buyurmaganda edi, yigit olomon o‘rtasidagi asosiy yulduz bo‘lib qolar edi. Davraga mashhur aktyor kirib kelgach, muxlislar uni olqishlar bilan kutib oldi.
Shalame bir necha ishtirokchilar bilan suratga tushib, o‘z yo‘lida davom etgan.
Shalamening Nyu Yorkka kelishi tasodif emas edi. U 2025-yilda katta ekranlarga chiqishi rejalashtirilgan “Marti Suprim” filmini suratga olish ishlarida qatnashmoqda.
Izoh (0)