O‘zbekistonda endi yo‘lning chetki chap qatorida harakatlangan yuk mashinalari haydovchilari jarimaga tortiladi. Ma’muriy javobgarlik to‘g‘risidagi kodeksga tegishli qo‘shimcha kiritildi 28-oktyabrdan kuchga kirdi.
Kodeksning yangilangan 128-moddasiga ko‘ra, yo‘lning chetki chap qatorida yuk avtomobillarining harakatlanishi (chapga burilish yoki orqaga qayrilish kabi ruxsat etilgan holatlar bundan mustasno) endi bazaviy hisoblash miqdorining 0,5 baravari, ya’ni 187,5 ming so‘m miqdorida jarima solishga sabab bo‘ladi.
Birinchi jarimadan keyin bir yil davomida takroran qoidabuzarlik BHMning 1 baravari (375 ming so‘m), uchinchi qoidabuzarlik BHMning 3 baravari (1 mln 125 ming so‘m), yil davomida to‘rtinchi va undan keyingi qoidabuzarliklar BHMning 4 baravari (1,5 mln so‘m) miqdorida jarima yoki transport vositasini boshqarish huquqidan 6 oy muddatga mahrum qilish bilan jazolanadi.
2022-yilda yangi tahrirdagi Yo‘l harakati qoidalari tasdiqlangandi. Unda yuk avtomobillari, Yo‘l harakati qoidalarida belgilangan ayrim istisnolardan tashqari barcha holatlarda, yo‘lning faqat o‘ng qatnov qismidan harakatlanishi shartligi belgilangandi. Biroq Ma’muriy kodeksda sanksiyalar belgilanmagani sabab qoidabuzarlik uchun jazolash imkoni yo‘q edi.
IIV JXD YHXX boshlig‘i o‘rinbosari Erali Bozorov avvalgi tartibda barcha transport vositalari uchun harakatlanish bir xil bo‘lganini, ammo bu qoida yaxshi natija bermaganini aytgandi.
“Hammamiz yo‘lda yuramiz. Yurayotganda trassalarda M39 yoki vodiyga ketishda e’tibor bersangiz, yuk avtomobillari chap qatorni egallab olib, hech kimga yo‘l bermaydi. U yerda tez tibbiy yordam mashinasi yoki boshqa shoshayotganlar bo‘ladi. Lekin ular mana shu trassalarda belgilangan tezlikda (juda ham sekin), ya’ni yo‘lni to‘liq egallab olgan holda harakatlanadi. Bunga hammamiz guvoh bo‘lganmiz. Lekin shu kunga qadar ularga chora ko‘rishning iloji yo‘q edi”, degan edi u.
Yuk mashinasiga chap tomonga harakatlanishiga istisno holat haqida ham aytib o‘tgandi.
“Transport vositasi chapga qayrilmoqchi bo‘lsa, yo‘l harakati qoidalari bo‘yicha chap qatorni egallashi kerak yoki orqaga qayrilib olish uchun chap qatorni egallashi lozim. Shu qoida istisno tariqasida ko‘rsatilgan. Bundan tashqari vaqtda yuk avtomobillarining barchasi oxirgi o‘ng tasmadan harakatlanishi kerak”, degan edi Erali Bozorov.
Izoh (0)