Bugun, 29-oktyabr kuni AOKAda o‘tkazilgan brifingda Sanepidqo‘mita axborot xizmati rahbari Maftuna Saidova YKEM — yuqumli kasalliklar elektron monitoringi ishga tushirilganini ma’lum qildi.
Aytilishicha, an’anaviy axborot almashinish tizimi orqali ma’lumotlarning yig‘ilishi, qayta ishlanishi va javob choralarining joylarga ko‘rsatma orqali yetkazilishi 12 soatdan 48 soatgacha vaqtni egallaydi.
Yuqumli kasallikka chalingan bir nafar bemor bu vaqt ichida kamida 2-3 nafar sog‘lom odam bilan muloqot qiladi, natijada ushbu sog‘lom shaxslarni kasallikning yashirin davri muddati davomida tibbiy nazoratga olish va karantin choralarini belgilashga zarurat tug‘iladi.
Yuqumli kasalliklar elektron monitoringi orqali axborotning tezkor va sifatli yetkazilishi ta’minlanadi. Bu esa yuqumli va o‘ta xavfli yuqumli kasalliklarni o‘z vaqtida bartaraf etish va tarqalib ketishining oldini olishga xizmat qiladi, deydi Maftuna Saidova.
Qo‘shimcha qilinishicha, Elektron vaksina logistikasini boshqarish tizimi ishga tushirilgan. Bu vaksinalarni viloyatlarga yuborish, viloyatlardan tumanlarga, tumanlardan esa davolash-profilaktika muassasalariga vaksinalarni sifatli va sovuqlik zanjiriga rioya qilgan holda yetkazilishini kuzatishga imkon beradi
Izoh (0)