Toshkent shahrida 17–25-oktyabr kunlari Xalqaro hamkorlik tashabbuslari haftaligi bo‘lib o‘tdi. Turli sohalarga doir muloqotlarda O‘zbekiston transport tizimi istiqbollari ham muhokama qilindi. Tadbir yakunida transport vaziri Ilhom Mahkamov jurnalistlar bilan suhbatda bo‘ldi, deya xabar qildi “Daryo” muxbiri.
Ilhom Mahkamov savollarga javob berar ekan, “Afrosiyob” poyezdlariga chiptalar narxi yuqoriligi va yetishmasligi bilan bog‘liq vaziyatni izohladi. Vazirning aytishicha, hozirda temiryo‘llarda 6 ta “Afrosiyob” poyezdlari harakatlanmoqda.
“Afrosiyob” poyezdlari o‘zini o‘zi oqlaydigan bo‘lsa, bozor iqtisodiyotiga o‘tsak, uning chiptalari narxi oshirilishi tabiiy. Respublika byudjeti bizlarga “Afrosiyob”dan tashqari bo‘lgan transport vositalari, boshqa turdagi vagonlarni subsidiya qilib berish kafolatini olgan. Biz yuqori tezlikda harakatlanadigan “Afrosiyob”ni tijoratlashtirishga o‘tyapmiz. Unga muqobil sifatida bilet narxi arzonroq bo‘lgan kupe va elektropoyezdlar bor. Hammamiz “Afrosiyob”ga yopishib olishimiz noto‘g‘ri. Masalan, Samarqandgacha faqatgina “Afrosiyob” bilan emas, har bir yo‘nalishda “Sharq”, “Nasaf” poyezdlarimiz mavjud. Narx masalasida sifatga qarashimiz kerak”, dedi vazirlik rahbari.
Ilhom Mahkamov “Daryo” muxbirining “Afrosiyob” poyezdlariga chipta narxlari oshgani talabga qanday taʼsir qildi”, degan savoliga ham javob qaytardi.
“Tezyurar poyezdlarga talab ortib bormoqda. Aholida jamoat transportidan foydalanish ulushi oshdi. Chiptalarni onlayn tarzda xarid qilish imkoniyatini yaratib beryapmiz. Biroq ‘onlayn sotuvda bilet yo‘q’, degan eʼtirozlar bildirilyapti. Hozir telefondan qarab berishim mumkin, chipta topish mumkin. Rivojlangan davlatlarda odamlar o‘zining harakatlanishini yarim yil oldin rejalashtiradi, poyezdga biletlarni ham yarim yil avval xarid qiladi. Hammasi rejali bo‘ladi. Albatta, bu tabiiy hol. 38 millionlik aholimiz bor. Biz poyezdlarga sutkasiga 1000–1200 kishiga taklif berayotganimizdan keyin, reysga 5–10 kun qolganda, tabiiyki, ulgurgan odam chipta sotib olaveradi”, dedi vazirlik rasmiysi.
Maʼlumot uchun, 2024-yil 15-maydan “Afrosiyob” elektropoyezdlarining chiptalar narxlari 20 foizdan 40 foizgacha oshirilgandi. Xususan, ekonom klassdagi vagonlarda Toshkent—Buxoro yo‘nalishi uchun chipta narxi 403 ming so‘m, Toshkent—Qarshiga 338 000 so‘m, Toshkent—Samarqandga 245 000 so‘m etib belgilangan. Biznes va VIP klass vagonlar uchun chiptalar narxlari 360 ming so‘mdan 795 ming so‘mgacha yetkazilgan.
Izoh (0)